धरानमा पहिलोपल्ट रात्रीकालीन फुटबल, गोधुली कप शुरु

खेलकुद/पर्यटन

गृहपृष्ठ
खेलकुद/पर्यटन

धरानमा पहिलोपल्ट रात्रीकालीन फुटबल, गोधुली कप शुरु

फक्ताङलुङ म्यागजिन संवाददाता शुक्रबार, चैत ७, २०८१

धरान गोधुली रनिङ कप फुटबल प्रतियोगिताको २५ औं संस्करण (रजत उत्सव) बिहीबारबाट सुरु भएको छ । भव्य समारोहकाबीच प्रतियोगिताको उद्घाटन धरान वडा नं. १७ का वडाध्यक्ष सूर्यबहादुर भट्टराईले गरे ।
धरानको अन्तर वडा फुटबल प्रतियोगिताको तामझाम सधै विशेष हुन्छ । रजत उत्सव भएका कारण यस पटक आयोजक गोधुली क्लबले धरानको इतिहासमा नै पहिलो पटक रात्रिकालीन फुटबल सञ्चालन गरेको छ । रात्रिकालिन फुटबल आयोजना गर्नकालागी गोधुली क्लबले धरान रंगशालामा बासको टावर बनाएर फ्लडलाइट जडान गरेको थियो । जसका कारण धराने दर्शकले धरान रंगशाला भरिएको थियो । भरिएको रंगशालामा धराने गायक पूर्ण राईले प्रस्तुती र त्यसपछि भएको आतिसबाजीले गोधुलीको उद्घाटन कार्यक्रम भव्य बन्यो ।
उद्घाटन खेलमा ५ नं. वडा विजयी
२५ औं गोधुली रनिङ कपको उद्घाटन खेलमा १६ नं. वडालाई २–१ गोल अन्तरले पराजित गर्दै ५ नं. वडा प्रतियोगिताको क्वाटर फाइनलमा प्रवेश गरेको छ । अत्यन्तै प्रतिष्पर्धात्मक खेलमा ५ नं. वडाले खेलको १७ औं मिनेटमा नै अग्रता लिएको थियो । सुजन इङनामले ५ नं. वडाकालागी पहिलो गोल गरेका थिए । त्यसको १० मिनेट वित्न नपाउदै १६ नं. वडाका सरुन श्रेष्ठले गोल गर्दै खेललाई १–१ को स्थितिमा ल्याएका थिए ।
पहिलो हाफ १–१ गोलको बराबरीमा सकिएपछि दोस्रो हाफको २२ औं मिनेटमा ५ नं. वडाका तिलबिक्रम लावतीले गोल गर्दै टोलीलाई २–१ को अग्रता दिलाए । लावतीले यस अघि वान भर्सेज वानको स्थितिमा गोल गर्न चुकेका थिए । खेलको म्यान अफ दि म्याच वडा ५ का तिलबिक्रम लावती घोषित भए । प्रतियोगितामा शुक्रबार वडा नं. १० र १२ बीच खेल हुने आयोजक गोधुली क्लबले जनाएको छ ।
चैत्र २१ गतेसम्म सञ्चालन हुने प्रतियोगितामा धरानका १८ वटा वडा सहभागी छन् । २ नं. वडा र ७ नं.वडाले प्रतियोगितामा सहभागीता जनाउन सकेनन् । प्रतियोगिताको विजेताले १ लाख ५० हजार र उप विजेताले ७५ हजार नगद पुरस्कार प्राप्त गर्नेछन् भने प्रतियोगिताको क्वाटर फाइलनमा पुगेको टिमले स्व. सुवास राई स्मृति सुपर ८ प्रतियोगितामा सहभागी हुने अवसर प्राप्त गर्ने आयोजक गोधुली क्लबका उपाध्यक्ष सतिस केसीले जानकारी दिए ।

प्रकाशित मिति: शुक्रबार, चैत ७, २०८१ ०६:४०

प्रतिक्रिया दिनुहोस्