कोशी प्रदेशका १४ जिल्लामा ‘ट्राफिक सप्ताह’ सुरु, ५३ प्रतिशत दुर्घटना तीव्र गतिका कारण

फिचर

गृहपृष्ठ
फिचर

कोशी प्रदेशका १४ जिल्लामा ‘ट्राफिक सप्ताह’ सुरु, ५३ प्रतिशत दुर्घटना तीव्र गतिका कारण

फक्ताङलुङ म्यागजिन संवाददाता मंगलबार, असार १९, २०८०

विराटनगर : दिनहुँ जस्तो हुने सवारी दुर्घटनालाई न्यूनीकरण गर्ने उद्देश्यका साथ कोशी प्रदेशको राजधानी विराटनगरबाट ट्राफिक सप्ताहको शुभारम्भ भएको छ। ट्राफिक सप्ताह कोशी प्रदेशको १४ वटै जिल्लामा आजबाट सुरु भएको नेपाल प्रहरी राजमार्ग सुरक्षा तथा ट्राफिक व्यवस्थापन कार्यालय इटहरीका प्रमुख एसपी श्यामकुमार महतोले जानकारी दिए।
नेपाल प्रहरी राजमार्ग सुरक्षा तथा ट्राफिक व्यवस्थापन कार्यालय इटहरी सुनसरीको आयोजना र आन्तरिक मामिला तथा कानुन मन्त्रालय कोशी प्रदेशको सहयोगमा आज (मंगलबार)बाट ट्राफिक सप्ताहको शुभारम्भ भएको हो।
विभिन्न संघसंस्थाको सहकार्यमा सप्ताहको पहिलो दिन ट्राफिक सचेतनामूलक प्लाकार्डसहित बिहान ७ बजेदेखि प्रभातफेरीसहित कार्यक्रमको उद्‍घाटन कोशी प्रदेशका मुख्यमन्त्री हिक्मतकुमार कार्कीले गरेका हुन्। मुख्मयन्त्री कार्कीले उद्‍घाटन समारोह कार्यक्रमलाई सम्बोधन गर्दै प्रत्येक व्यक्ति सचेत भए सवारी दुर्घटना न्यूनीकरण हुने बताए। कार्यक्रममा बोल्दै प्रदेश प्रहरी प्रमुख डिआइजी राजेशनाथ बास्तोलाले सडक दुर्घटना भयावह बन्दै गएको बताए। भयावह बन्दै गएको दुर्घटनाको अवस्थालाई न्यूनीकरण गर्ने उद्देश्यले पनि ट्राफिक सप्ताह सञ्चालन गरिएको बताए।
दुर्घटनामा ज्यान गुमाउने कति ?
कोशी प्रदेशमा आर्थिक वर्ष २०७५।७६ मा ३७३ जनाले सवारी दुर्घटनामा परेर ज्यान गुमाएका छन्। २०७६।७७ मा ३३२ जना २०७७।७८ मा ४४४ जनाको मृत्यु भएको नेपाल प्रहरी राजमार्ग सुरक्षा तथा ट्राफिक व्यवस्थापन कार्यालय इटहरीका प्रमुख एसपी श्यामकुमार महतोले जानकारी दिए।
उनका अनुसार गत वर्ष मात्रै यस प्रदेशमा ३ हजार ८२० दुर्घटनामा परी ५३१ जनाको मृत्यु भएको छ। जसमा १ हजार ११४ जना गम्भीर घाइते र ५ हजार ३३५ जना सामान्य घाइते भएका छन्। उनका अनुसार वर्षेनि ८० प्रतिशत दुर्घटना वृद्धि भएको उनले बताए। अधिकांश सवारी दुर्घटनामा मानवीय त्रुटि प्रमुख कारणको रूपमा रहेको उनले बताए।
चालक र सडक प्रयोगकर्ताहरूले ट्राफिक नियमको पूर्ण पालना गरेको खण्डमा दुर्घटनामा न्यूनीकरण हुने उनको भनाइ थियो।
५३ प्रतिशत दुर्घटना तीव्र गतिका कारण
‘दुर्घटनाको मानवीय कारणहरूको विश्लेषण गर्दा ५३ प्रतिशत दुर्घटना तीव्र गतिका कारण देखिएको एसपी महतोले बताए। उनका अनुसार १६ प्रतिशत दुर्घटना चालकको लापरबाही, १० प्रतिशत दुर्घटना चालकले मादक पदार्थको सेवन गरी सवारी चलाउँदा र ७ प्रतिशत दुर्घटना चालक अनुमतिपत्र नलिएर दुर्घटना भएको देखिएको छ।
१२ प्रतिशत दुर्घटना सडक प्रयोगकर्ताले असावधानीपूर्वक सडक प्रयोग गरेको कारणले दुर्घटना भएको देखिएको र यसरी भएको दुर्घटनालाई नजिकबाट नियाल्दा ५७ प्रतिशत दुर्घटनामा मोटरसाइकल, १६ प्रतिशत दुर्घटना सिटी, इ रिक्सा तथा टेम्पु र ११ प्रतिशत दुर्घटनामा साना सवारीसाधनको संलग्नता रहेको एसपी महतोले जानकारी दिए।
मादकपदार्थ समेत चेकजाँच गर्ने
मादकपदार्थ सेवनलाई चेकजाँच गर्दा चालकले लागुऔषध सेवन गर्ने गरेको गुनासो आएकाले लागुऔषध चेकजाँज गर्ने अभियान समेत सञ्चालन गर्ने उनले बताए।
‘मादकपदार्थ सेवनलाई चेकजाँच गर्दा धेरै जस्तो चालकले पनि लागुऔषध सेवन गर्ने गरेको पाइएको छ’, उनले भने,‘ हामीसँग लागुऔषध जाँच्ने किट थिएन, अब लागुऔषधविरुद्धको चेकजाँज गरी यो अभियान पनि सञ्चालन गर्ने प्रक्रियामा जान्छौँ।’
ट्राफिक सप्ताह वर्षेनि हुने गरेको जानकारी दिँदै उनले यो कार्यक्रम निकै प्रभावकारी भएको समेत बताए। उनले प्रदेशभर ४७४ जना ट्राफिक प्रहरी रहेको जानकारी दिँदै उनले केही कार्ययोजनामा जनशक्ति अपुग भए पनि प्राविधिक पहुँचसम्म पुर्‍याएर प्राविधिक स्रोत सामग्रीको बढीभन्दा बढी उपलब्ध गराउन सके यो जनशक्ति थोरै नभएको दाबी गरे।
कुन-कुन दिन के कस्तो कार्यक्रम हुन्छ?
ट्राफिक सप्ताहअन्तर्गत दोस्रो दिन पेटी तथा जेब्रा क्रसबाट हिँड्न सिकाउने, सवारीसाधनको गति कम गर्न प्रेरित गर्ने तथा जेब्रा क्रसमा पैदल यात्रीलाई प्राथमिकता दिने, तेस्रो दिन पार्किङ एवं सडक, पेटी व्यवस्थित गर्दै ट्राफिक सचेतनासम्बन्धी पर्चा र पम्प्लेट वितरण गरिने कार्यक्रम रहेको जिल्ला ट्राफिक प्रहरी कार्यालय मोरङका प्रमुख ट्राफिक प्रहरी निरीक्षक सुनिल श्रेष्ठले जानकारी दिए।
तेस्रो दिन स्थानीय तहका प्रमुखहरूको उपस्थितिमा ट्राफिक सङ्केतका बोर्डहरू राख्ने, सडकमा राखिएका निर्माण सामग्री हटाउने र सडकमा भएका खाल्डा खुल्डीलाई सरोकारवाला निकायहरूसँग समन्वय गरी मर्मत गर्न लगाउने कार्यक्रम छ।
यसैगरी चौथो दिन विराटनगर बसपार्कमा सवारी चालकहरूलाई सचेतना कार्यक्रम र पाँचौँ दिन सचेतना, छैटौँ दिन चालकको स्वास्थ्य जाँच र सवारीको यान्त्रिक चेकजाँच र अन्तिम दिन अन्तरसंवाद गर्दै समापन गरिने ट्राफिक प्रहरी निरीक्षक श्रेष्ठले जानकारी दिए।