सप्तकोशीमा मोटरबोट दुर्घटना: जसले बचाए ८ जनाको ज्यान

फिचर

गृहपृष्ठ
फिचर

सप्तकोशीमा मोटरबोट दुर्घटना: जसले बचाए ८ जनाको ज्यान

फक्ताङलुङ म्यागजिन संवाददाता मंगलबार, कात्तिक ११, २०८३

रत्नप्रसाद आचार्य
सुनसरी : सुनसरीको बराहक्षेत्र मन्दिरबाट भोजपुरको सिम्लेतर्फ गएर फर्किंदै गरेको मोटरबोट सप्तकोशीमा दुर्घटनामा परेपछि नदीमा बगिरहेका यात्रुको उद्धारमा खटिएर खगेश श्रेष्ठले साहसिक काम गरेका छन्। दुर्घटनामा परेका यात्रुलाई बचाउन आफ्नो ज्यानको समेत पर्वाह नगरी नदीमा हामफालेका श्रेष्ठले आठ जनाको ज्यान बचाउन सफल भएका हुन्।
आइतबार दिउँसो बराहक्षेत्रदेखि भोजपुरको सिम्लेसम्म नियमित रूपमा मोटरबोट चलाउँदै आएका श्रेष्ठ आइतबार पनि सात जना यात्रु बोकेर भोजपुरतर्फ जाँदै थिए। सोही क्रममा धनकुटाको त्रिवेणीस्थित खुवालुङभन्दा केही तल नदीमा मानिसहरू बगिरहेको देखेपछि उनले आफ्नो यात्रालाई बीचमै रोकेर उद्धारमा जुट्ने निर्णय गरे। आफ्नो मोटरबोटमा रहेका सात जना यात्रुलाई सुरक्षित रूपमा नदी किनारमा छाडेपछि श्रेष्ठ तत्कालै दुर्घटनामा परेका यात्रुको उद्धारमा खटिए। सप्तकोशीको तीव्र बहावमा बगिरहेका मानिसलाई देखेपछि आफूले सक्दो प्रयास गरेर उनीहरूलाई बचाउन खोजेको श्रेष्ठले बताए।
‘म बराहक्षेत्रबाट सात जना यात्रु बोकेर भोजपुरतर्फ जाँदै थिएँ। त्रिवेणीको खुवालुङभन्दा तल मानिसहरू नदीमा बगिरहेको देखेँ। त्यसपछि हतारहतार आफ्ना यात्रुलाई नदी किनारमा सुरक्षित राखेर उद्धारमा जुटेँ,’ श्रेष्ठले भने, ‘मैले ११ जनालाई नदीबाट उद्धार गरेर मोटरबोटमा राखी बराहक्षेत्रसम्म ल्याएँ।’ उनका अनुसार उद्धार गरिएका यात्रुलाई बराहक्षेत्र मन्दिरसम्म ल्याउँदा उनीहरू सबै सकुशल अवस्थामा थिए। तर, उद्धार गरिएकामध्ये तीन जनाको पछि मृत्यु भएको खबर पाएको उनले बताए। आफूले उद्धार गरेर ल्याउँदा यात्रुहरू जीवितै र सकुशल रहेको उनको भनाइ छ। ‘मैले उद्धार गरेर बराहक्षेत्र मन्दिरसम्म ल्याउँदा सबै सकुशल हुनुहुन्थ्यो। पछि उद्धार गरिएकामध्ये तीन जनाको मृत्यु भएको खबर पाएँ,’ श्रेष्ठले भने।
श्रेष्ठका अनुसार दुर्घटनामा परेका यात्रुमध्ये केहीले लाइफ ज्याकेट लगाएका थिए भने केहीले लगाएका थिएनन्। नदीमा बगिरहेका यात्रुको उद्धार गर्न कठिन भए पनि आफूले सक्दो प्रयास गरेको उनले बताए। मोटरबोट चलिरहेको अवस्थामा एक्कासि इन्जिन बन्द भएपछि दुर्घटना भएको यात्रुहरूले आफूलाई बताएको श्रेष्ठले जानकारी दिए। इन्जिन बन्द भएपछि मोटरबोट दुर्घटनामा परेको र यात्रुहरू नदीमा खसेको उनीहरूको भनाइ उद्धृत गर्दै श्रेष्ठले बताए।
सप्तकोसीको तीव्र बहाव र जोखिमपूर्ण परिस्थितिमा समेत यात्रुको उद्धारमा खटिएका श्रेष्ठको साहसले मानवीय संवेदनशीलता र नागरिक कर्तव्यको उच्च उदाहरण प्रस्तुत गरेको छ। आफ्ना यात्रुलाई सुरक्षित स्थानमा राखेर अरूको जीवन बचाउन नदीमा बगिरहेका मानिसको उद्धारमा जुटेको भन्दै इलाका प्रहरी कार्यालय महेन्द्रनगरका प्रहरी निरीक्षक विक्रम भट्टराईले खगेशको मानवीय साहसको उच्च प्रशंसा गरेका छन्।
सप्तकोसीमा भएको मोटरबोट दुर्घटनाले नदीमा यात्रा गर्दा आवश्यक सुरक्षा सावधानी अपनाउनुपर्ने विषयलाई समेत पुनः स्मरण गराएको उनको भनाइ छ। विशेषगरी मोटरबोटमा यात्रा गर्ने सबै यात्रुले अनिवार्य रूपमा लाइफ ज्याकेट प्रयोग गर्ने र मोटरबोटको प्राविधिक अवस्था नियमित जाँच गर्ने व्यवस्था प्रभावकारी बनाउनुपर्ने स्थानीय बासिन्दाले बताएका छन्। सप्तकोसी नदीमा आइतबार मोटरबोट दुर्घटना हुँदा ३ जनाको मृत्यु र ४ जना बेपत्ता भएका छन्। बेपत्ता भएका नागरिक र दुर्घटनामा परेको मोटरबोट अझै भेटिएको छैन। प्रहरीले मोटरबोटका चालक सुनन मगरलाई पक्राउ गरेको छ।

प्रकाशित मिति: मंगलबार, कात्तिक ११, २०८३ ०९:११

प्रतिक्रिया दिनुहोस्