धरानमा गठबन्धनबीच तालमेलमा झमेला

दैनिक समाचार

गृहपृष्ठ
दैनिक समाचार

धरानमा गठबन्धनबीच तालमेलमा झमेला

फक्ताङलुङ म्यागजिन संवाददाता आइतबार, वैशाख ४, २०७९

धरानः सत्ता गठबन्धनका सहयात्री दलले महत्वाकाङ्क्षी माग अघि सारेपछि धरानलगायत सुनसरीमै चुनावी तालमेलको विषय पेचिलो बनेको छ । नेकपा माओवादी केन्द्रले धेरैजसो स्थानीय तहमा मेयर, उपमेयर माग्न थालेपछि चुनावी तालमेल पेचिलो बनेको हो ।
चुनावी तालमेल गर्ने मुख्य एजेण्डासहित बसेको बैठक बिनानिष्कर्ष टुङ्गीएको नेपाली काङ्ग्रेस, सुनसरी क्षेत्र नं. १ को क्षेत्रीय सभापति सुजेन्द्र तामाङले जानकारी दिए । उनका अनुसार सुनसरीमा माओवादी केन्द्रले धेरै स्थानीय तहमा प्रमुख, उपप्रमुखसहित प्रमुख तथा अध्यक्ष मागेपछि गठबन्धन दल भित्र तालमेलको विषय सङ्कटमा धकेलिएको छ ।
उनका अनुसार नेकपा माओवादीले धरान उपमहानगरपालिकाकै मात्रै कुरा गर्ने हो भने मेयरसहित ३, ४, ५, ११, १५, १७, १९ र २० मागेको उनले जानकारी दिए । उनका अनुसार नेकपा एकीकृत समाजवादीले ४, ५, ६, ११, १५ र १६, राष्ट्रिय जनमोर्चाले ४ र ५ तथा जनता समाजवादी पार्टीले उपप्रमुखसहित ११, १५ र १९ वडामा नेतृत्व दावी गरेपछि चुनावी गठबन्धन हुन नसक्ने भएको हो ।
‘जुनअनुसार गठबन्धनको मोडालिटी बनेको छ, त्यहीअनुसार जाने हो भने गठबन्धन सम्भावना छ, त्यो भन्दा बाहिर गएर साङ्गठनिक क्षमता भुलेर, अस्वभाविकरुपमा बढी दावी गर्नुभयो त मिल्ने अवस्था देखिँदैन ।’ उनले भने ।
उनले विशेषतः धरानमा गठबन्धन हुनैनसक्ने तर्क गरे । ‘धरान मेरो क्षेत्रअन्तर्गत पर्ने हुनाले म आफू गठबन्धन नहुने पक्षमै छु, यहाँ त झन् मतभारभन्दा बढी माओवादीले दावी गरेको छ’, उनले भने, ‘त्यही भएर गठबन्धन सम्भव देखिएन ।’
उनका अनुसार धरानमा काङ्ग्रेसले अवस्था र आवश्यकता हरेर मेयरसहित केही वडामा दावी गरेको छ । उपमेयर र ४ वटा वडा माओवादीलाई, जनता समाजवादी पार्टीलाई दुईवटा वडा र अन्य दललाई पनि केही वडा दिनेमा एक खालको सहमति बनेपनि माओवादी नै मिल्न नसकेको उनले बताए ।

प्रकाशित मिति: आइतबार, वैशाख ४, २०७९ २२:११

प्रतिक्रिया दिनुहोस्