बालेन र हर्क सिंहदरबार अन्यको सांसद बन्ने दाउमा ‘ब्रेक’

फिचर

गृहपृष्ठ
फिचर

बालेन र हर्क सिंहदरबार अन्यको सांसद बन्ने दाउमा ‘ब्रेक’

फक्ताङलुङ म्यागजिन संवाददाता सोमबार, फागुन २५, २०८२

स्थानीय तह र प्रदेशको सुरक्षित पद त्यागेर संघीय संसद् छिर्ने सपना बुनेका अधिकांश जनप्रतिनिधिलाई यो निर्वाचनमा मतदाताले नराम्रोसँग पछारिदिएका छन् ।
देशभरिका दर्जनौं बहालवाला जनप्रतिनिधि राजीनामा दिएर चुनावी मैदानमा उत्रिए पनि जनताले धरानका मेयर (निवर्तमान) हर्क साम्पाङ र काठमाडौंका बालेन शाहलाई मात्र ‘सिंहदरबार यात्रा’को अनुमति दिएका छन् ।
तलको पद छाडेर संघमा फड्को मार्न खोज्ने अन्य स्थानीय र प्रदेशका जनप्रतिनिधिलाई (राजीनामा दिएका) भने मतदाताले ‘ब्रेक’ लगाइदिएका छन् ।
काठमाडौं महानगरपालिकाको मेयर पद त्यागेर संसदीय राजनीतिमा होमिएका बालेन झापा क्षेत्र नम्बर ५ बाट निर्वाचित भए । उनले ६८ हजार ३४८ मत प्राप्त गर्दै ४ पटक प्रधानमन्त्री भइसकेका एमाले अध्यक्ष केपी शर्मा ओलीलाई पराजित गरे । शाह र ओलीबीचको मतान्तर नै ४९ हजार ६१४ रह्यो, जुन यो निर्वाचनकै ऐतिहासिक मतान्तर हो ।
बालेनपछि सबैभन्दा बढी चर्चामा रहेका धरान उपमहानगरपालिकाका तत्कालीन मेयर हर्कराज राई (हर्क साम्पाङ) पनि फराकिलो मतान्तरले विजयी भएका छन ।
आइतबार सार्वजनिक अन्तिम मतपरिणाम अनुसार सुनसरी क्षेत्र नम्बर १ बाट श्रम संस्कृति पार्टीका अध्यक्ष साम्पाङले ३५ हजार ७४१ मत ल्याएर जित दर्ता गरे । उनले निकटतम् प्रतिस्पर्धी रास्वपाकी गोमा तामाङलाई ८ हजार ४९२ मतान्तरले पराजित गरे ।
बालेन र हर्कले जितिरहँदा बहालवाला जनप्रतिनिधिबाट राजीनामा दिएका अरूको अवस्था भने दयनीय देखिएको छ । चितवन महानगरपालिकाकी तत्कालीन मेयर रेनु दाहाल चितवन क्षेत्र नम्बर ३ मा रास्वपाकी सोविता गौतमसँग भारी मतान्तरले पराजित भइन् ।
गौतमले ५९ हजार २७७ मत ल्याउँदा नेकपाकी उम्मेदवार दाहाल २० हजार ६१५ मतमा सीमित भइन् । उनीहरूबीचको मतान्तर ३८ हजार ६६२ रहेको छ ।
कोशी प्रदेशमा पनि पद त्यागेर संघीय सांसद बन्न तम्सिएका प्रदेश सांसद र पालिका प्रमुखहरूमध्ये हर्क साम्पाङ बाहेक अरू सबै पराजित भएका छन् । झापा क्षेत्र नम्बर ४ मा प्रदेश सांसद पद त्यागेर उठेका राप्रपाका भक्ति प्रसाद सिटौलाले लज्जास्पद हार बेहोर्दै जमानत समेत जोगाउन सकेनन् । उनले मात्र २ हजार ८० मत पाउँदा रास्वपाका शम्भुप्रसाद ढकाल ४३ हजार ६३१ मतका साथ विजयी भए । यस्तै, मोरङको रंगेलीका प्रमुख दिलीपकुमार अग्रवाल मोरङ–२ मा रास्वपाका कृष्णकुमार कार्कीसँग पराजित भए ।
पालिका प्रमुखको पद छोडेर चुनावी मैदानमा आएका इलामका रणबहादुर राई, सोलुखुम्बुका असिम राई, उदयपुरका मेजर राई र ओखलढुङ्गाकी उपाध्यक्ष अस्मिता थापाको सिंहदरबार छिर्ने सपना पनि अधुरै रह्यो ।
उदयपुर २ का मेजर राईले त जम्मा ९० मत मात्रै प्राप्त गरेर जमानत जफत गराए । नेकपाले टिकट नदिएपछि उनले राजीनामा दिएर स्वतन्त्र उम्मेदवारी दिएका थिए ।
यस्तै, धरान-१७ का वडाध्यक्ष पद छाडेर संघीय सांसद लडेका सूर्यबहादुर भट्टराई पनि तेस्रो स्थानमा खुम्चिएका छन् ।