सुनसरी आजदेखि शान्त, सुरक्षा व्यवस्था कडा, कर्फ्यु जारी

फिचर

गृहपृष्ठ
फिचर

सुनसरी आजदेखि शान्त, सुरक्षा व्यवस्था कडा, कर्फ्यु जारी

फक्ताङलुङ म्यागजिन संवाददाता बुधबार, साउन १३, २०८३

धरानः सुनसरीको देवानगन्जमा आइतबार रातिदेखि सुरु भएको तनाव सोमबार र मंगलबार हिंसात्मक बने पनि बुधबार अवस्था उल्लेख्य रूपमा शान्त देखिएको छ । कर्फ्यु आदेश भने यथावत् राखिएको छ । जिल्लाभर सुरक्षा व्यवस्था झन् कडा पारिएको छ ।
उच्च सुरक्षा सतर्कताबीच बुधबारबाट तनाव मत्थर हुँदै गएको हो । मंगलबार रातिसम्म बजार क्षेत्रमा झडप र तनाव भइरहे पनि बुधबार दिनभर ठूलो अप्रिय घटना भएन । बाक्लो संख्यामा नेपाल प्रहरी, सशस्त्र प्रहरी र नेपाली सेनाको परिचालन गरिएकाले अवस्था नियन्त्रणमा रहेको प्रशासनले जनाएको छ । कर्फ्यु जारी रहेकाले सर्वसाधारणलाई भेला, जुलुस तथा अनावश्यक आवतजावतमा रोक लगाइएको छ ।
गृहमन्त्रालयले गठन गरेको सहसचिव भूपेन्द्र थापा नेतृत्वको छानबिन समिति बुधबार पहिलो पटक घटनास्थल पुगेर स्थलगत अध्ययन गरेको छ । समितिले स्थानीय बासिन्दासँग बयान लिँदै घटनास्थलबाट आवश्यक प्रमाण संकलन गरेको छ । मंगलबार नै टोली घटनास्थल जाने तयारीमा रहे पनि दुई पक्षबीचको तनावका कारण सम्भव भएको थिएन । यसअघि समितिले अस्पतालमै पुगेर गोलीले घाइते भएकाहरूको बयान लिएको थियो ।
बुधबार घटनास्थल पुगेको छानबिन टोलीलाई स्थानीयले निष्पक्ष अनुसन्धानको माग गर्दै ज्ञापनपत्रसमेत बुझाएका छन् । तनाव अन्य क्षेत्रमा फैलिन सक्ने संकेत देखिएपछि राजनीतिक दलहरूले पनि सक्रियता बढाएका छन् । काठमाडौंमा भएको सर्वदलीय छलफलको निर्णयअनुसार देवानगन्ज र हरिनगर गाउँपालिकामा सर्वदलीय बैठक बसेर सामाजिक सद्भाव कायम गर्न संयुक्त अपिल गर्ने निर्णय गरिएको छ ।
जिल्ला प्रशासन कार्यालय सुनसरीमा बुधबार बसेको सर्वदलीय बैठकले पनि सबै पक्षले संयमता अपनाउँदै सामाजिक सद्भाव कायम गर्न पहल गर्ने निर्णय गरेको छ । कोशी प्रदेशका मुख्यमन्त्री हिक्मतकुमार कार्कीको अध्यक्षतामा आन्तरिक मामिला तथा कानुन मन्त्रालयमा पनि सर्वपक्षीय बैठक भयो । यद्यपि, अवस्था पूर्ण रूपमा सामान्य भने भइसकेको छैन । बुधबार हरिनगर, घुस्की, दुहबी र लौकहीलगायतका क्षेत्रमा विरोध प्रदर्शन भएका थिए । केही स्थानमा छिटफुट तनाव देखिए पनि ठूलो घटना हुन पाएन ।
सुनसरी प्रहरीका सूचना अधिकारी डीएसपी चन्द्रबहादुर खड्काले मंगलबारको तुलनामा बुधबारको अवस्था धेरै सुधारिएको बताए । उनका अनुसार स्थानीय तहमा सर्वदलीय छलफल, सुरक्षा निकायको समन्वय र प्रशासनको सक्रियताले अवस्था नियन्त्रणतर्फ गएको हो । उनले कर्फ्यु जारी रहेकाले सुरक्षा सतर्कता अझै घटाइएको छैन ।
साम्प्रदायिक तनावको प्रभाव सीमावर्ती क्षेत्रमा पनि देखिएपछि प्रशासनले भारतसँग जोडिएका नाकामा निगरानी बढाएको छ । भारतबाट नेपाल प्रवेश गर्ने व्यक्तिका लागि परिचयपत्र अनिवार्य गरिएको छ । कोशी प्रदेशका मुख्यमन्त्री हिक्मतकुमार कार्कीले बोलाएको सर्वपक्षीय बैठकमा कोशी प्रदेशका प्रहरी प्रमुख डीआईजी शेखर खनालले सीमामा कडा निगरानी गरिएको जानकारी दिएका थिए । मोरङका प्रमुख जिल्ला अधिकारी युवराज कटेलले पनि मोरङका सबै सीमा नाकामा सुरक्षा व्यवस्था थप कडा बनाइएको बताएका छन् ।
यसैबीच, बुधबार हरिनगरमा आन्दोलनकारी समूहले इलाका प्रहरी कार्यालय देवानगन्जका प्रमुख, इन्स्पेक्टर प्रकाश पराजुलीले प्रयोग गरिरहेको ना १ झ ८७४ नम्बरको सरकारी गाडीमा आक्रमण गरेका छन् । ढुंगामुढा हुँदा गाडीको सिसा फुटेको थियो भने केहीबेर अवस्था तनावपूर्ण बनेको थियो ।
तनाव बढिरहेका बेला इटहरीमा भने सामाजिक सद्भावको सन्देश दिँदै नागरिक समाजको अगुवाइमा शान्ति र्‍याली निकालिएको छ । र्‍यालीमा सहभागीहरूले अफवाहको पछि नलाग्न, संयमता अपनाउन र दुई समुदायबीचको विश्वास कायम राख्न आग्रह गरेका थिए ।
घटनापछि राहत र पुनःस्थापनाको विषयमा कोशी प्रदेश सरकारले निर्णय गरेको छ । मुख्यमन्त्री हिक्मतकुमार कार्कीले मृतकका परिवारलाई २ लाख रुपैयाँ, घाइतेलाई जनही ५० हजार रुपैयाँ तथा आगजनीबाट घर, पसल वा अन्य सम्पत्ति क्षति भएकालाई पनि ५० हजार रुपैयाँ राहत उपलब्ध गराइने घोषणा गरेका छन् । राहत जिल्ला प्रशासन कार्यालयको सिफारिसका आधारमा वितरण गरिनेछ ।
प्रदेश सरकारले बोलाएको सर्वपक्षीय बैठकले सामाजिक सद्भाव कायम गर्न आठबुँदे निर्णय पनि गरेको छ । निर्णयअनुसार पालिका तहमा सर्वदलीय र सर्वपक्षीय बैठक सञ्चालन गर्ने, साम्प्रदायिक सद्भावका कार्यक्रम अघि बढाउने र राजनीतिक, प्रशासनिक तथा सामाजिक पक्षबीच समन्वय बढाउने सहमति भएको छ ।
संघीय सरकारले भने बुधबार बसेको मन्त्रिपरिषद् बैठकबाट घटनाका सम्बन्धमा कुनै नयाँ निर्णय सार्वजनिक गरेको छैन । त्यसअघि दोषीमाथि कारबाही गर्ने प्रतिबद्धता भने सरकारले व्यक्त गरेको थियो ।
गोली लागेर र त्यसपछिका विभिन्न घटनामा घाइते हुने को संख्या २२ पुगेको छ । उपचारपछि एक जना घर फर्किसकेका छन् भने २१ जना अझै विराटनगरका विभिन्न अस्पतालमा उपचाररत छन् । जिल्ला प्रहरी कार्यालय मोरङका अनुसार न्युरो अस्पतालमा ९, विराट नर्सिङ होममा ४, नोबेलमा २, विराट मेडिकलमा २, गोल्डेन अस्पतालमा २ र अन्य अस्पतालमा ३ जनाको उपचार भइरहेको छ ।
आइतबार राति प्रहरीको गोली लागेर ज्यान गुमाएका देवानगन्ज–४ का २५ वर्षीय ओमप्रकाश मेहताको शव भने न्युरो अस्पतालमै राखिएको छ । प्रशासनले घटनाको निष्पक्ष छानबिन र शान्ति पुनःस्थापनाको प्रयासलाई तीव्र बनाइएको जनाएको छ ।