धरानको पिण्डेश्वर मन्दिरमा बोलबम भक्तजनको घुइँचो

दैनिक समाचार

गृहपृष्ठ
दैनिक समाचार

धरानको पिण्डेश्वर मन्दिरमा बोलबम भक्तजनको घुइँचो

फक्ताङलुङ म्यागजिन संवाददाता सोमबार, साउन २५, २०८३

धरानः प्रत्येक वर्ष साउनमा धरानस्थित पिण्डेश्वर मन्दिरमा लाग्ने बोलबम मेलामा यसवर्ष साउनको अन्तिम सोमबार करिब १ लाख ५० हजार भक्तजनले जल चढाएका छन् ।
सुनसरीको चतरास्थित कोशी नदीबाट जल बोकेर पैदल ल्याई पिण्डेश्वरमा चढाउने परम्परा छ । यस वर्षदेखि धरान–४ स्थित शिवजट्टाबाट पनि जल ल्याई चढाउने परम्पराको नयाँ थालनी शुरुवात भएको छ । ०४२ सालदेखि पिण्डेश्वरमा जल चढाउन बोलबम मेलाको सुरुवात गरिएको हो । सोमबार भएकोले श्रद्धालु भक्तजनहरुको भीड लागेको धरान–१४ का वडाध्यक्ष कृष्णप्रसाद भट्टराईले जानकारी दिए । ‘आइतबार बेलुका ९ बजेदेखि सोमबार ६ बजेसम्म नै श्रद्धालु भक्तजनहरुको भीड लाग्यो’, उनले भने, ‘करिब १ लाख ५० हजार भक्तजनले पिण्डेश्वरमा जल चढाएको अनुमान गरेका छौं ।’ यसपटक छिमेकी राष्ट्र भारत, बंगलादेश, भुटानदेखि पूर्व पश्चिमसम्मका भक्तजनहरुको उपस्थिति रहेको उनले जानकारी दिए । उनका अनुसार यसपटक तराईका विभिन्न जिल्लाबाट भक्तजनहरु उर्लिएका थिए ।
साउनको सोमबार ब्रत बस्दै शिवजीलाई जल चढाए राम्रो श्रीमान् पाइने, श्रीमानसहित परिवारमा सुख समृद्धि हुने र मनोकामना पूरा हुने विश्वास गरिन्छ । धरानको पिण्डेश्वर अमृतको अंशवाट स्थापित भएकोले पनि यहाँ पवित्र जल चढाउँदा अमृतको प्रभाव पाइने स्कन्ध पुराणमा उल्लेख भएको बताइन्छ ।
देश–विदेशबाट भक्तजनहरुको भीड लागेको पिण्डेश्वर बाबाधाम समितिका अध्यक्ष विकास बनेपालेले जानकारी दिए । उनका अनुसार आइतबार राति ९ बजे नै मन्दिरको ढोका खोलिने गरिएको र सोमबार साँझसम्म भक्तजनहरु जल चढाउन आइरहेका थिए । ‘पहिला पहिलाजस्तै साउने सोमबार सयौं दर्शनार्थी बिहानैदेखि आएका छन् । अधिक भीड बढेको छ । भीड देखिएको छ ।’ उनले भने, ‘साउन महिनामा धरान बजार गेरुबस्त्रधारीहरुले पहेंलपुर हुने गरेको छ । विजयपुरको पाखा र धरानका मुख्य चोकमा यति बेला पहेलाबस्त्रधारीको भीड बढेको छ ।’
धरानको पुरानो बजार क्षेत्रमा साउनका भक्तजनहरुलाई लक्षित गरेर व्यापारीहरुले पहिलो लुगा नै बेच्न राख्ने गरेका छन् । भनौं साउन महिना धरान पहेलपुर हुने गरेको छ । पिण्डेश्वर बाबाधाममा अधिकांश महिलाको उपस्थित बढी हुने गरेको छ । विवाहित महिलाले पतिको दीर्घ जीवनको कामना गर्ने र अविवाहिता युवतीले राम्रो पति पाऊँ भन्दै शिवलिंगमा जल चढाउने गरेको विश्वास गरिन्छ ।
भक्तजनहरुलाई सहजताका लागि प्रहरी परिचालन, शौचालय र ट्राफिक व्यवस्थापनलाई ध्यान पुरयाएकोे वडाध्यक्ष भट्टराई बताउँछन् । साउनको चौथो सोमबार पनि बढी भक्तजन आउने उनले बताए ।
चतरादेखि जल ल्याई नांगो खुट्टाले हिँडेर गई पिण्डेश्वरमा जल चढाउने नै बोलबमको विशेषता र मौलिकता हो । तर, हिँड्न नसक्ने भक्तजनले भने यातायात साधनमा आई बोलबममा सहभागिता जनाउँछन् । चतरा कौशिकीमा स्नान गर्दा शरीर शुद्ध हुने धार्मिक विश्वास छ ।
स्कन्दपुराणको हिमवत्खण्ड अन्तरगत रुद्राक्षण माहात्म्यले पिण्डेश्वर बाबा धामको उत्पतिको बारेमा वर्णन गरेको छ । पिण्डेश्वर परिसरलाई रुद्राक्षका वनको रुपमा उल्लेख गरेको छ । यस मन्दिरमा मध्यकाली कला कैशलका नमुनाहरु रहेका कारण पिण्डेश्वर बाबा धामको ख्याती मध्यकालमा पनि रहेको बताइन्छ । मन्दिरको दक्षिणी भेगमा पिण्डेश्वर भगवानको मन्दिर रहेको छ । त्यस्तै गणेश अस्टभुजा लगायतका मन्दिरहरु रहेको छ । त्यस्तै मुल मन्दिरको बाहिर हनुमान, सरस्वती तथा सन्तोषी माताको पनि मन्दिर रहेको छ । यहाँको सरस्वती कुण्ड धार्मिक पर्यटकहरुका लागि आकर्षको केन्द्र बनेको छ ।

प्रकाशित मिति: सोमबार, साउन २५, २०८३ १२:१५

प्रतिक्रिया दिनुहोस्