चाडबाडको समयमा प्रदेश १ मा ५७ जनाको मृत्यु

दैनिक समाचार

गृहपृष्ठ
दैनिक समाचार

चाडबाडको समयमा प्रदेश १ मा ५७ जनाको मृत्यु

फक्ताङलुङ म्यागजिन संवाददाता बिहीबार, कात्तिक १३, २०८३

दसैँको अवधिमा १४ जिल्ला रहेको कोशी प्रदेशमा विभिन्न आपराधिक घटनाहरु भएका छन्। प्रदेशमा २२५ वटा घटना भएका हुन्। ती घटनामा ५७ जनाको मृत्यु भएको छ।
फूलपातीदेखि कोजाग्रत पूर्णिमासम्म १० दिनको अवधिमा भएका घटनामा ६५ जना घाइते भएका छन् प्रहरीको तथ्यांकले चाडपर्वका बेला आपराधिक गतिविधिसँगै आत्महत्या र विभिन्न दुर्घटना पनि मानवीय क्षतिको प्रमुख कारण बनेको देखाएको छ। कोशी प्रदेश प्रहरी कार्यालय विराटनगरका एसपी सुमन तिम्सिनाका अनुसार असोज ३१ देखि कात्तिक ९ गतेसम्मको अवधिमा सबैभन्दा बढी मृत्यु आत्महत्यासम्बन्धी घटनामा भएको छ। झुण्डिएर आत्महत्या तथा त्यससँग सम्बन्धित ४४ घटनामा ४० जनाको मृत्यु भएको उनले बताए। उनका अनुसार पानीमा डुबेर तथा बगाएर पाँच जनाले ज्यान गुमाएका छन्। सप्तकोशी नदीमा डुंगा दुर्घटना हुँदा तीन जनाको मृत्यु भएको जानकारी तिम्सिनाले दिए।
विष सेवन र आगलागीका घटनाले पनि मानवीय क्षति बढाएका छन्। विष सेवनका २४ घटनामा तीन जनाको मृत्यु र ११ जना घाइते भएका छन्। आगलागीका २३ घटनामा एक जनाको मृत्यु र दुई जना घाइते भएका छन्। धारिलो हतियार प्रहारका १४ घटनामा एक जनाको मृत्यु हुँदा ११ जना घाइते भएका छन्। जनावरको आक्रमणबाट दुई जना र करेन्ट लागेर एक जनाको मृत्यु भएको एसपी तिम्सिनाले बताए। कुटपिट र झैझगडाका घटना नियन्त्रणमा पनि प्रहरीको सक्रियता बढाउनुपर्ने अवस्था देखिएको छ। कुटपिटका ३६ घटनामा ३१ जना घाइते भएका छन्। घटनामा संलग्न रहेको आरोपमा २८ जना पक्राउ परेका छन्। झैझगडाका पाँच घटनामा पाँच जना घाइते भएका छन् भने तीन जना पक्राउ परेका छन्।
दसैँको अवधिमा चोरीका आठ घटना भएका छन्। चोरीमा संलग्न रहेको आरोपमा आठ जना पक्राउ परेका छन्। फरार प्रतिवादी ११ जना पक्राउ परेका छन्। प्रहरीले हातहतियार बरामदसम्बन्धी चार घटना पनि अभिलेख गरेको छ। अन्य प्रकृतिका ४८ घटनामा एक जनाको मृत्यु र एक जना घाइते भएको जानकारी तिम्सिनाले दिए।
प्रदेश प्रहरी कार्यालयको विवरणअनुसार समग्र घटनामा संलग्न रहेको आरोपमा ५९ जना पक्राउ परेका छन्। घटनाको संख्या र मानवीय क्षति उल्लेख्य भए पनि प्रहरीले सुरक्षा व्यवस्थापनका दृष्टिले दसैँलाई समग्रमा शान्तिपूर्ण मानेको छ। तिम्सिनाका अनुसार चाडपर्वमा चोरी, लुटपाट, ठगी, झैझगडा तथा सवारी दुर्घटना नियन्त्रण गर्न विशेष सुरक्षा योजना लागू गरिएको थियो। प्रदेशका १४ वटै जिल्लामा आठ हजार १३३ जनाभन्दा बढी प्रहरी परिचालन गरिएको उनले बताए।
यात्रुको आवागमन सहज बनाउन ७२ स्थानमा यात्रु सहायता कक्ष स्थापना गरिएका थिए। राजमार्गमा स्कर्टिङ, ट्राफिक प्रहरीसहित संयुक्त चेकजाँच तथा मोबाइल र पैदल गस्ती परिचालन गरिएको जानकारी तिम्सिनाले दिए। धार्मिक तथा पर्यटकीय स्थलमा भिड व्यवस्थापन, सरकारी कार्यालय, बैंक तथा वित्तीय संस्था र आर्थिक कारोबार हुने स्थानको सुरक्षामा पनि विशेष निगरानी गरिएको थियो। भिडभाड हुने स्थानमा सिसी क्यामेराबाट निगरानी गर्नुका साथै आवश्यकताअनुसार ड्रोन क्यामेरासमेत प्रयोग गरिएको तिम्सिना बताउँछन्। सुरक्षा योजना र प्रहरी परिचालनका कारण ठूला तथा अप्रिय घटना हुन नपाएको प्रहरीको निष्कर्ष छ।
कोशी प्रदेश प्रहरी प्रमुख डीआईजी शेखर खनालले छिटपुट घटना भए पनि दसैँ शान्तिपूर्ण रूपमा सम्पन्न भएको बताए। उनका अनुसार अब तिहार र छठ लगायतका चाडपर्वलाई लक्षित गरेर सुरक्षा व्यवस्थालाई प्राथमिकता दिइएको छ। चाडपर्वमा घर खाली गरेर बाहिर जाँदा सुरक्षाको प्रबन्ध मिलाउन, सार्वजनिक यातायातमा सामानको ख्याल गर्न, आर्थिक कारोबारमा सतर्क रहन तथा शंकास्पद गतिविधि देखिए तत्काल प्रहरीलाई खबर गर्न प्रहरीले नागरिकलाई आग्रह गरेको छ। आगामी चाडपर्वमा चोरी, ठगी, झैझगडा र दुर्घटना न्यूनीकरण गर्दै नागरिकलाई सुरक्षित वातावरणमा चाडपर्व मनाउने अवस्था सुनिश्चित गर्ने प्रहरीको योजना रहेको जानकारी डीआईजी खनालले दिए।

प्रकाशित मिति: बिहीबार, कात्तिक १३, २०८३ १९:०५

प्रतिक्रिया दिनुहोस्