१५ जोडीको सामूहिक विवाह

दैनिक समाचार

गृहपृष्ठ
दैनिक समाचार

१५ जोडीको सामूहिक विवाह

फक्ताङलुङ म्यागजिन संवाददाता शुक्रबार, वैशाख ७, २०८१

विराटनगरस्थित शिव मन्दिरबाट बिहीबार दिउँसो लावालस्करसहित १५ वटा सिटीरिक्सामा बेहुला लिएर जन्तीको टोली अतिथि सदन हुइँकिएको थियो ।
महेश्वरी महिला मञ्च विराटनगरले जहदाँ गाँउपालिकाका विपन्न तथा गरिब समुदायबाट एकैपटक विहीबार १५ जोडीको सामुदायिक विवाह गर्दा बेहुला पक्ष नाचगान गर्दै अतिथि सदन पुगेको हो ।
अखिल भारतवर्षीय महेश्वरी महिला संगठनकी उपाध्यक्ष तथा नेपाल उद्योग परिसंघकी उपाध्यक्ष गिरिजा सारडाले जहदाँ गाँउपालिकाले जोडी खोजेर सहजीकरण गरेको जानकारी दिइन् ।
करिब ३५ लाख रुपैया खर्च भएको बताउँदै उनले विवाह गर्न रहर भएर पनि नसक्नेलाई मञ्चले सहायता गरेको बताइन् ।
उनले भनिन्, ‘धेरैको चाहना राम्रो विवाह गरौँ भन्ने हुन्छ । कतिको सम्भव हुन्छ कति सक्दैनन् । त्यसमा पनि गरिब र विपन्न मानिसका लागि विवाह गाह्रो जस्तो भइसकेको छ । त्यसैले पनि हामीले कदम चालेका हौँ ।’
विवाहमा अधिकांश मुर्मु जातिका बेहुलाबेहुली रहेको बताउँदै विवाहमा सबैलाई समान रुपमा मण्डपमा राखेर सरसमान दिएर खुशी साथ विदाइ गरिएको सारडाले जानकारी दिइन् ।
उपाध्यक्ष सारडाले विवाहमा प्रत्येक बेहुलीलाई तिलहरीदेखि घाँटीमा लगाउने सुनको चेन, कानको झुम्का, चाँदीको पायल, लेहङ्गा, ७ वटा साडी, दराज, पलङ लगायतका सामाग्री उपलब्ध गराएको बताइन् । त्यसैगरि, बेहुलालाई समेत ३ सेट सर्टपेन्ट, खाद्यान्न, भाडाकुडाँ दिइएको थियो । महेश्वरी महिला मञ्ज विराटनगरकी अध्यक्ष पुनम राठीले समस्यामा रहेका विपन्न समुदायका युवालाई विवाह गराउन मञ्चले नै मुख्य भूमिका खेलेको जानकारी दिइन् ।

प्रकाशित मिति: शुक्रबार, वैशाख ७, २०८१ ०८:५७

प्रतिक्रिया दिनुहोस्