तराईमा हुस्सु र कुहिरो

दैनिक समाचार

गृहपृष्ठ
दैनिक समाचार

तराईमा हुस्सु र कुहिरो

फक्ताङलुङ म्यागजिन संवाददाता बुधबार, पुस २४, २०८१

लगातारको कुहिरो र हुस्सुले तराईको जनजीवन प्रभावित भएको छ । चिसोका कारण महोत्तरीका सबैजसो पालिकाले विद्यालय बन्द गरेका छन् । हुस्सु र कुहिरोका कारण बिहानदेखि बन्द भएको पूर्व–पश्चिम राजमार्गअन्तर्गत बुटवल–नारायणगढ सडक दिउँसोपछि एकतर्फी खुलेको छ । अहिले पनि सडक यात्रा जोखिमपूर्ण रहेको प्रहरीले जनाएको छ ।
तराई मधेशमा मानिसहरू घरबाहिर निस्कन सकेका छैनन् । तराई मधेशका जिल्लामा केही दिनदेखि नै बाक्लो हुस्सु र कुहिरो लाग्दै आएकोमा हिजो र आज झनै बढेको मौसम पूर्वानुमान महाशाखाका मौसमविद् गोविन्द झाले जानकारी दिए ।
उनका अनुसार आज पूर्वी तराईमा दिउँसो केही कम भए पनि मध्य र पश्चिम तराईमा दिनभर बाक्लो हुस्सु लागेको छ । आज राति हुस्सु केही कम भए पनि भोलि पुनः हुस्सु लाग्ने सम्भावना रहेको झाले बताए ।
भोलि पनि पूर्वी तराईमा दिउँसो केही कम भए पनि मध्य र पश्चिम तराईमा दिनभर नै हुस्सु लाग्ने सभ्भावना छ । मध्य र पश्चिम तराईमा घरबाहिर निस्कँदा कपडा भिज्ने खालको शीतलहर चलिरहेको स्थानीय बासिन्दा बताउँछन् । तर सरकारले शीतलहर घोषणा गरिसकेको छैन । शीतलहर चलेको घोषणा गर्न आवश्यक मापदण्डबारेमा सुक्ष्म अवलोकन गरिरहेको र सबै मापदण्ड पूरा भएमा घोषणा गर्ने मौसम पूर्वानुमान महाशाखाका मौसमविद् गोविन्द झाले बताए । शीतलहरमा मापदण्डहरू पूरा हुने चरणमा रहेको र आज बेलुकासम्मको तथ्याङ्क हेरेर निर्णय गर्ने उनको भनाइ छ ।
मौसमविद् झाका अनुसार अधिकतम र न्यूनतम तापक्रमबीच पाँच डिग्री सेल्सियस फरक, पारदर्शिता एक किलोमिटरभन्दा कम र पानी तपतप चुहिने अवस्था लगातार तीन दिनसम्म भयो भने शीतलहर चलेको घोषणा गरिन्छ ।

प्रकाशित मिति: बुधबार, पुस २४, २०८१ १९:१९

प्रतिक्रिया दिनुहोस्