केवलकार निर्माण विवादः धरानमा परिस्थिति बेग्लै, १५० जना बढीले दिए स्वेच्छिक गिरफ्तारी

दैनिक समाचार

गृहपृष्ठ
दैनिक समाचार

केवलकार निर्माण विवादः धरानमा परिस्थिति बेग्लै, १५० जना बढीले दिए स्वेच्छिक गिरफ्तारी

फक्ताङलुङ म्यागजिन संवाददाता मंगलबार, माघ २२, २०८१

धरानमा पक्राउ परेका ६ जना आन्दोलनकारीको रिहाइको माग गर्दै १५० जनाभन्दा धेरे आन्दोलनकारीले इलाका प्रहरी कार्यालयमा स्वेच्छिक गिरफ्तारी दिएका छन् । पाथीभरा (मुक्कुमलुङ) मा केबुलकार निर्माणविरुद्धको आन्दोलनमा सरकारले वार्ता आह्वान गरेको अवस्थामा धरानमा भने परिस्थिति पेचिलो बनेको हो ।
यातायात बन्दको क्रममा प्रहरीले माघ २० पक्राउ गरेका जसपाका नेता सुमन चेम्जोङसहित ६ जना युवाहरूलाई ७ दिनको म्याद थपेपछि धरानमा सोमबार साँझ आन्दोलनकारीहरूले गिरफ्तारी दिएका हुन् । जसपाका नेता ताजुब लिम्बूका अनुसार सरकारले वार्तामा बोलाए पनि आइतबार धरानबाट बिना कारण पक्राउ परेका नेता तथा कार्यकर्ता नछोडिएपछि गिरफ्तारी दिएको बताए ।
‘१५८ जनाले सामूहिक गिरफ्तारी दिएका छौँ । आधिकारिक नामसहित आएको भनेर अहिले ९ बजे बुझाएको हौँ’, लिम्बूले शिलापत्रसँग भने । माघ २०,२१ गते यातायात बन्दको घोषणा गरिएको थियो । सो क्रमममा ६ जना आन्दोलनकारी पक्राउ परेका थिए । शान्तिपूर्ण आन्दोलन गरिरहेको बेला पक्राउ गरेर मुद्दा चलाएको आरोप आन्दोलनकारी समूहले लगाएको छ ।
‘न सरकारी न निजी सम्पत्ति तोडफोड गरेका थियौँ । अहिलेसम्म आन्दोलनमा पक्राउ गरेपछि साँझ छोड्ने गरेको थियो । तर, यहाँ त म्याद थप गरियो’, जसपा नेता लिम्बूले भने, ‘हिजो छोड्न आग्रह गर्‍यौँ । तर, छोडिएन । आज पनि छोडिएन । अनि सामूहिक गिरफ्तारी दिएका हौं ।’
इलाका प्रहरी कार्यलयका डीएसपी प्रकाश जवेगुले भने प्रहरीले गिरफ्तार नगरेको बताए । ‘उहाँहरू इलाका परिसरमा हुनुहुन्छ । हामीले उहाँहरूलाई गिरफ्तार गरेका छैनौँ । मिल्दैन पनि’, जवेगुले भने ।

प्रकाशित मिति: मंगलबार, माघ २२, २०८१ ०७:३६

प्रतिक्रिया दिनुहोस्