धरानको नगरसभा असोज ४ गते, जेनजी आन्दोलनका क्रममा सहिद भएका परिवारलाई ५ लाख दिने निर्णय

दैनिक समाचार

गृहपृष्ठ
दैनिक समाचार

धरानको नगरसभा असोज ४ गते, जेनजी आन्दोलनका क्रममा सहिद भएका परिवारलाई ५ लाख दिने निर्णय

फक्ताङलुङ म्यागजिन संवाददाता बिहीबार, असोज २, २०८२

लामो समयदेखि ‘बजेट होलिडे’को अवस्थामा रहेको धरान उपमहानगरपालिकामा अन्ततः बजेट पारित हुने प्रक्रिया शुरू भएको छ । बिहीबार बसेको नगर कार्यपालिकाको बैठकले आउँदो शनिबार नगरसभा बोलाएर बजेट पेस गर्ने निर्णय गरेको हो ।
हालै काठमाडौंबाट फर्किएका मेयर हर्क साम्पाङ नगरसभामा बोलाउन तयार भएका हुन् ।
उपमहानगरपालिकाले करिब २ अर्ब २० करोड रूपैयाँको बजेट ल्याउने तयारी गरेको उपमेयर आइन्द्रविक्रम बेघाले जानकारी दिए ।
स्थानीय सरकार सञ्चालन ऐनअनुसार असार मसान्तभित्रै पारित गरिसक्नुपर्ने बजेट मेयर र उपमेयर तथा कार्यपालिका सदस्यहरूबीचको विवादका कारण समयमा आउन नसक्दा धरानमा बजेट शून्यताको अवस्था थियो ।
बजेट अभावमा कर्मचारीको तलब, सामाजिक सुरक्षा भत्ता वितरण, विकास निर्माणका काम र अन्य आर्थिक कारोबार ठप्प भएका थिए ।
‘आज बसेको कार्यपालिका बैठकले यही शनिबार नगरसभामा बजेट पेस गर्ने निर्णय गरेको छ । हामी लगभग २ अर्ब २० करोडको बजेट ल्याउने तयारीमा छौं’, कार्यपालिका बैठकले गरेको निर्णयबारे जानकारी दिँदै उपमेयर बेघाले भने ।
यसैबीच, कार्यपालिकाले काठमाडौंमा भएको जेनजी आन्दोलनका क्रममा निधन भएका धरान–५ का साजन राईका दुई छोराको अध्ययनका लागि ५ लाख रूपैयाँको शैक्षिक कोष स्थापना गर्ने निर्णय समेत गरेको छ ।
लामो समयको राजनीतिक खिचातानी र विवादपछि धरानले बजेट पाउने वातावरण बनेको एक कार्यपालिका सदस्यले बताए ।

प्रकाशित मिति: बिहीबार, असोज २, २०८२ १९:४६

प्रतिक्रिया दिनुहोस्