धरान/ सुनसरीमा लागूऔषधविरुद्ध प्रहरीले कडा कारबाही अघि बढाएको छ। धरान उपमहानगरपालिका–१६ बाट ट्रामाडोलसहित एक युवक पक्राउ परेका छन् भने बराहक्षेत्रमा ठूलो परिमाणको गाँजासहित दुई जनालाई नियन्त्रणमा लिइएको छ।
धरान उपमहानगरपालिका–१६ स्थित नौलो बस्तीमा अस्थायी प्रहरी बिट जोरसखुवाबाट खटिएको प्रहरी टोलीले २८ मंसिर साँझ ४:१० बजे नियमित गस्तीका क्रममा शंकास्पद अवस्थामा फेला परेका २९ वर्षीय विष्णु सुब्बालाई चेकजाँच गर्दा लागूऔषध बरामद गरेको हो।
प्रहरीले उनको साथबाट ट्रामाडोल ५२५ ट्याब्लेट र डिक्लोमाइन ३७५ ट्याब्लेट गरी जम्मा ९०० ट्याब्लेट लागूऔषध फेला पारेको जनाएको छ। सुब्बालाई लागूऔषधसहित नियन्त्रणमा लिई इलाका प्रहरी कार्यालय धरानमा ल्याई थप अनुसन्धान भइरहेको छ।
यसैबीच, २९ मंसिर राति १२:४५ बजे बराहक्षेत्र नगरपालिका–३ नडाहा–धरान जंगल क्षेत्रमा इलाका प्रहरी कार्यालय महेन्द्रनगर र सशस्त्र प्रहरी बेस क्याम्प चतराबाट खटिएको संयुक्त चेकिङ टोलीले ठूलो परिमाणको गाँजा बरामद गरेको छ।
धरानबाट नडाहा तर्फ जाँदै गरेको बा. १८ च. ३८३४ नम्बरको कारलाई कानुनबमोजिम चेकजाँच तथा खानतलासी गर्दा कारको पछाडिको सिट र डिक्कीमा कालो प्लास्टिकमा प्याक गरिएको पाँच वटा पोकाभित्र गाँजा १३० केजी फेला परेको प्रहरीले जनाएको छ।
उक्त लागूऔषध र कारसहित कार चालक इटहरी उपमहानगरपालिका–१७ पकलीका २४ वर्षीय करण साह र कारमा सवार विराटनगर महानगरपालिका–५ का २१ वर्षीय सचिन मेहतालाई नियन्त्रणमा लिई इलाका प्रहरी कार्यालय महेन्द्रनगरमा ल्याइएको छ। घटनाबारे थप अनुसन्धान भइरहेको जिल्ला प्रहरी कार्यालय सुनसरीले जनाएको छ।
प्रहरीले लागूऔषध ओसारपसार नियन्त्रणका लागि जिल्लाभर निगरानी र चेकजाँचलाई अझ कडा बनाइने जनाएको छ।
