चार सय किलो गाँजासहित पक्राउ

दैनिक समाचार

गृहपृष्ठ
दैनिक समाचार

चार सय किलो गाँजासहित पक्राउ

फक्ताङलुङ म्यागजिन संवाददाता बिहीबार, फागुन ५, २०७८

उदयपुर: ठूलो मात्रामा गाँजा बरामद भएको छ । जिल्लाको बेलका नगरपालिका वडा नम्बर ८ सिरुवानी भन्ने ठाउँबाट १६ बोरा गाँजा प्रहरी टोलीले पक्राउ गरेको हो ।
जिल्ला प्रहरी कार्यालय उदयपुरका प्रवक्ता डीएसपी बेदप्रसाद गौतमका अनुसार यो वर्षकै सबैभन्दा ठूलो परिमाण हो । स्थानीय गोप्य सूत्रका अनुसार गाँजाको कारोवार भइरहेको भन्ने सूचना आएपछि इलाका प्रहरी कार्यालय रामपुर ठोक्सीलाबाट खटिएको टोलीले संलग्न तीन जनालाई समेत नियन्त्रणमा लिएको छ ।
पक्राउ पर्नेहरुमा गाडी (भ्यान) चालक तथा धनी समेत रहेका बेलका ८ का स्थानीय २७ वर्षीय गोकुल राई, बेलका वडा नम्बर ७ का २९ वर्षीय मनोज राई, सुनसरीको बराहक्षेत्र नगरपालिका वडा नम्बर १ का २३ वर्षीय मनिष थामी रहेका छन् ।
को १ ज २७६१ नम्बरको महेन्द्र पिकप भ्यानबाट लैजान तयार पारिएको गाँजा समातिएको हो । निलो बोराभित्र गाँजा भ्यानभित्र हालेर बाहीरबाट निलो त्रिपालले छोपेर थाहा नपाउने गरी लैजान खोज्दा सूत्रको सहयोगमा पक्राउ गर्न प्रहरी सफल भएको प्रवक्ता गौतमको भनाई छ ।
उदयपुर प्रहरीका अनुसार समातिएको सो तयारी गाँजाको तौल ४०० किलो छ । जसको नेपाली बजार मूल्य लाखौ पर्न जान्छ । पक्राउ परेकाहरुको साथबाट त्रीसठी हजार २५ रुपैयाँ नगद समेत बरामद भएको छ ।
त्यस्तै पक्राउ तीन जनाको साथबाट सामसुङ कम्पनीको गोल्डेन कलर स्मार्टफोन १ थान, रेडमी कम्पनीको स्मार्टफोन (कालो रंग) १ थान, रेडमी कम्पनीको (हरियो रंग) स्मार्टफोन १ थान र नोकिया कम्पनीको सादा फोनसेट १ थान बरामद भएको प्रवक्ता गौतमलले जेठोखबरलाई जानकारी दिए ।
उनीहरुलाई जिल्ला अदालत उदयपुरबाट १० दिनको म्याद थप गरी कानुनी कारवाहीका लागि अनुसन्धान प्रक्रिया अगाडि बढाइएको छ ।

प्रकाशित मिति: बिहीबार, फागुन ५, २०७८ १९:१८

प्रतिक्रिया दिनुहोस्