धरानमा एमालेको बृहत क्षेत्रीय आमसभा, सुनसरी १ वामपन्थीहरूको पवित्र भूमिः गौतम

दैनिक समाचार

गृहपृष्ठ
दैनिक समाचार

धरानमा एमालेको बृहत क्षेत्रीय आमसभा, सुनसरी १ वामपन्थीहरूको पवित्र भूमिः गौतम

फक्ताङलुङ म्यागजिन संवाददाता आइतबार, फागुन १७, २०८२

नेकपा (एमाले) का केन्द्रीय सदस्य राजेन्द्र गौतमले सुनसरी-१ वामपन्थीहरूको पवित्र भूमि रहेको बताएका छन्।
शनिबार धरान उपमहानगरपालिकामा आयोजित एमालेको बृहत् क्षेत्रीय आमसभालाई सम्बोधन गर्दै उनले उक्त क्षेत्र ऐतिहासिक तथा सम्मानित व्यक्तित्वहरू निर्वाचित भएको भूमि भएको उल्लेख गरेका हुन् ।
उनले एमालेका प्रथम जननिर्वाचित प्रधानमन्त्री मनमोहन अधिकारी, पूर्वउपसभामुख लीला श्रेष्ठ सुब्बा, कवि कुन्ता शर्मा, तारा सुब्बा, मनोज मेन्याङ्बो, जयकुमार राई, वम देवान लगायतका व्यक्तित्वहरू यही क्षेत्रबाट निर्वाचित भई जनताको सेवा गरेको स्मरण गरे।
सुनसरी–१ ले राजनीतिक र ऐतिहासिक रूपमा छुट्टै पहिचान बनाएको उल्लेख गर्दै उनले एमालेले यस क्षेत्रलाई अत्यन्त महत्त्वपूर्ण रूपमा लिएको बताए। आगामी निर्वाचनका लागि प्रत्यक्षतर्फ टीकाराम लिम्बु तथा समानुपातिकतर्फ मौसम राईलाई उम्मेदवार बनाइएको जानकारी दिँदै जनसमक्ष सहयोगको अपिल पनि गरे।
उनले देशको सार्वभौमसत्ता जनतामा निहित रहेको र जनताले शासन गर्ने वातावरण निर्माण गर्न मुलुक निर्वाचनमा गएको बताए। संविधानलाई सही मार्गमा ल्याई पूर्ण रूपमा कार्यान्वयन गर्न निर्वाचन आवश्यक रहेको उनको भनाइ थियो। सुनसरी क्षेत्र नं. १ मा नेकपा एमालेले आफ्नो विजय यात्रालाई निरन्तरता दिने उद्घोष गरेको छ ।
जनविश्वास र संगठनात्मक सुदृढीकरण नै एमालेले आफ्नो जितको आधार भएको दाबी गरेको छ । फागुन २१ गते निर्धारित प्रतिनिधि सभाको निर्वाचनमा एमालेले विजय प्राप्त गर्ने सुनिश्चित भएको चुनावी सभाका वक्ताहरूले बताएका छन् ।
पार्टीकी केन्द्रीय सदस्य तथा सुनसरी–१ निर्वाचन परिचालन कमिटी संयोजक मञ्जु भण्डारीले धरान क्षेत्रमा सम्पन्न तथा कार्यान्वयनको चरणमा रहेका विकास आयोजनालाई निरन्तरता दिन एमालेको विजय अपरिहार्य रहेको बताइन् ।
धरानका अधिकांश सडक, खानेपानी तथा बसपार्क निर्माणका योजना एमालेकै नेतृत्वमा अगाडि बढाइएको उनको भनाइ थियो । ती योजनाको स्वामित्व अन्यत्र दाबी गरिनु अनुचित भएको उनले बताइन् । केन्द्रमा प्रभावकारी नीति निर्माणका लागि शिक्षित तथा ऊर्जावान् युवा नेतृत्व आवश्यक रहेको उल्लेख गर्दै उम्मेदवार लिम्बू सक्षम रहेको बताइन् ।
नेकपा एमालेका प्रदेश कमिटी सदस्य तथा पूर्व प्रतिनिधि सभा सदस्य जयकुमार राईले कुनै योजना, एजेण्डा, नीति नभएका पार्टीहरु अर्काको विरोधमा उत्रिएको टिप्पणी गरे । उनले भने, 'कसैलाई गाली गर्नका लागि नेकपा एमालेले मञ्च खडा गरेको होइन, जसको एजेण्डा छैन, जसले विकास गरेको छैन उसले मात्रै गाली गर्छन् ।'
'नयाँ-पुराना दलको गलत भाष्य बनाउन खोजिएको छ, पुराना पार्टीको त्याग, तपस्या र बलिदानबाट बनेको संवैधानिक अधिकार प्रयोग गरी चुनाव हुँदैछ,' पूर्वसांसद राईले भने- 'जनताको मतलाई हामीले खेर फालेका छैनौं । विगतका अधुरा योजना पूरा गर्न एमालेका उम्मेदवारलाई विजयी बनाउन आवश्यक छ ।'
उनले आफ्नो लामो भाषणमा सुनसरी-१ मा एमालेले गरेका विकास निर्माणको फेहरिस्त सुनाए । प्रदेश सभा सदस्य तथा एमाले प्रदेश कमिटी सदस्य विजय राई ले चुनावी सभामा देखिएको जनसहभागिताले पार्टीको पक्षमा सकारात्मक वातावरण बनेको बताए ।
चुनावी सभामा बोल्दै उम्मेदवार टिकाराम लिम्बूले जनतासँग गरेको प्रतिबद्धताअनुसार पारदर्शी र उत्तरदायी ढङ्गले कार्यसम्पादन गर्ने अठोट गरे । स्थानीय, प्रदेश र संघीय तहबीच समन्वय गरी विकास योजनालाई प्रभावकारी रूपमा कार्यान्वयन गर्ने उनको प्रतिबद्धता थियो ।
'जनताको विश्वासलाई कार्यदक्षताबाट प्रमाणित गर्नेछु,' उनले भने । पूर्वाधार, सेवा र उत्पादनमा आत्मनिर्भर क्षेत्र विकासका लागि निरन्तर लागिपर्ने उम्मेदवार लिम्बूको भनाइ थियो।
यस्तै समानुपातिक उम्मेदवार मौसम राईले सुनसरी १ का २७ वटा वडाको समुचित विकासका लागि जनताले भिजन र नीति भएको पार्टीका उम्मेदवारलाई अवसर प्रदान गर्नुपर्ने बताइन् । राष्ट्रिय स्वतन्त्र पार्टी परित्याग गरी एमालेमै फर्किएका युवा नेता ठाकुर कार्कीले स्पष्ट नीति र दीर्घकालीन दृष्टिकोणसहितको राजनीतिक यात्राका लागि एमालेमै पुनरागमन गरेको बताए ।
चुनावी सभामा सुनसरी-१ का धरानसहित वराहक्षेत्र र रामधुनीबाट सांस्कृतिक झाँकीसहितको सहभागिता थियो । कुन्ता शर्मा, देउमाया थापा, वंशी मोक्तानलगायतका अग्रज वाम नेताहरूको मञ्चमा देखिएका थिए ।
‘समृद्ध नेपाल, सुखी नेपाली’ को राष्ट्रिय विकासको नयाँ मोडेल कार्यान्वयनका लागि पनि एमाले आवश्यक रहेको उल्लेख गर्दै उनले केही दलहरूले चुनावअघि नै प्रधानमन्त्री घोषणा गरिरहेको विषयमा संविधानअनुसार प्रतिनिधि सभामा बहुमत १ सय ३८ सिट प्राप्त गरेपछि मात्र प्रधानमन्त्री चयन हुने व्यवस्था रहेको स्पष्ट पारे। नीति, सिद्धान्त र राष्ट्रिय कार्यक्रम स्पष्ट नगरी अघि बढ्ने दलप्रति जनतालाई सचेत रहन आग्रह गरेका थिए ।
गत भदौ २३ र २४ गतेको 'विपद्'ले देशमा ठूलो क्षति पुर्‍याएको स्मरण गर्दै उनले उक्त अवस्थाबाट मुलुकलाई पुनर्गठन र पुनर्निर्माणतर्फ लैजानुपर्ने आवश्यकता औंल्याए। सो मार्गमा एमाले अघि बढिरहेको उनको भनाइ थियो।
सुनसरी-१ का उम्मेदवार टीकाराम लिम्बुले जनताले भिजन र नीति भएको पार्टीका उम्मेदवारलाई जिताउनुपर्ने बताए । जनतासँग गरेको प्रतिबद्धताअनुसार पारदर्शी र उत्तरदायी ढङ्गले कार्यसम्पादन गर्ने र स्थानीय, प्रदेश र संघीय तहबीच समन्वय गरी विकास योजनालाई प्रभावकारी रूपमा कार्यान्वयन गर्ने उनको दाबी थियो ।