रास्वपा सरकारलाई सहयोग गर्छौंः हर्क साम्पाङ

दैनिक समाचार

गृहपृष्ठ
दैनिक समाचार

रास्वपा सरकारलाई सहयोग गर्छौंः हर्क साम्पाङ

फक्ताङलुङ म्यागजिन संवाददाता बिहीबार, चैत १२, २०८२

श्रम संस्कृति पार्टीका अध्यक्ष हर्क साम्पाङले पार्टीले अब बन्ने सरकारलाई प्रतिपक्षमा बसेर रचनात्मक सहयोग गर्ने बताएका छन् ।
बिहीबार सिंहदरबारमा शपथग्रहणपछि सञ्चारकर्मीहरूसँग कुरा गर्दे उनले नयाँ बन्ने सरकारलाई प्रश्न गरेर सहयोग गर्ने बताए । आलोचनाले पनि सरकारलाई सहयोग हुने उनको भनाइ छ ।
स्वच्छ आलोचनाले सरकारलाई सही ट्र्याकमा ल्याउने भएकोले आफूहरूले प्रतिपक्षको भूमिका निर्वाह गर्ने साम्पाङको भनाइ छ । रास्वपाले जनताको हितमा हुने गरी संविधान संशोधनको एजेन्डा ल्याए दुईतिहाइ पुर्‍याउन सहयोग गर्ने पनि बताए ।
जनताले आफूहरूलाई प्रतिपक्षमा बसेर सरकारको खबरदारी गर्ने म्यान्डेट दिएको उनको भनाइ छ । आगामी पाँच वर्ष समयको सही सदुपयोग गरी काम गर्नुपर्ने उनको भनाइ छ ।
यस्तो छ हर्क साम्पाङको भनाइ :
हामी सरकारलाई प्रतिपक्षमा रहेर प्रश्न गर्छौं, सहयोग गर्छौं । सरकारले गर्नुपने काम जे छ, त्यसलाई प्रतिपक्षले पनि सहयोग नै गरिरहेको हुन्छ । आलोचना, विरोधबाट पनि हामी सिकिरहेका हुन्छौँ, यसले हामी कता जाँदैछौँ भन्ने कुरालाई निर्धारण गरिदिन्छ । हामी सरकारलाई देशलाई सघाउने पक्षमा नै छौँ । हामी विपक्षीमा नै रहेर सहयोग गर्छौं ।
कानुन निर्माणको लागि समान्य बहुमत भए पुग्छ, त्यो उहाँहरूसँग छ । संविधान संशोधनको लागी दुईतिहाइको आवश्यक पर्ने हो । कुन प्रायोजनको लागि उहाँहरूले प्रस्ताव लिएर आउनुहुन्छ, त्यसमा हेरेर दुईतिहाइबाट आवश्यक पर्ने बेलामा सहयोग गर्ने/नगर्ने भन्ने निर्णय गर्छौं । देश र जनताको हितमा हुने प्रस्ताव आए सहयोग गर्न तयार छौँ ।

प्रकाशित मिति: बिहीबार, चैत १२, २०८२ १७:१५

प्रतिक्रिया दिनुहोस्