सुनसरीमा बर्डफ्लु, प्रशासनद्वारा कडाइ, कुखुरा ओसारपसारमा पूर्ण प्रतिबन्ध

दैनिक समाचार

गृहपृष्ठ
दैनिक समाचार

सुनसरीमा बर्डफ्लु, प्रशासनद्वारा कडाइ, कुखुरा ओसारपसारमा पूर्ण प्रतिबन्ध

फक्ताङलुङ म्यागजिन संवाददाता बुधबार, वैशाख ९, २०८३

धरानःजिल्लाका विभिन्न स्थानमा बर्ड फ्लु देखिएपछि प्रशासनले नियन्त्रणका उपायहरू कडाइका साथ अघि बढाएको छ।
पछिल्लो समय इटहरी, इनरुवा, दुहबी तथा गढी गाउँपालिकाका विभिन्न कुखुरापालन फार्महरूमा एभियन इन्फ्लुएन्जा (एच५एन१) पुष्टि भएसँगै उच्च सतर्कता अपनाइएको हो।
जिल्ला प्रशासन कार्यालयका अनुसार सङ्क्रमण फैलिन नदिन प्रभावित क्षेत्रलाई केन्द्र मानेर चार किलोमिटर वरपरको क्षेत्रलाई सङ्कटग्रस्त घोषणा गरिएको छ।
सो क्षेत्रमा कुखुरा, चल्ला तथा कुखुराजन्य वस्तुहरूको ओसारपसारमा वैशाख १४ गतेसम्म पूर्ण प्रतिबन्ध लगाइएको छ। प्रशासनले जिल्लाभित्र र बाहिरबाट यस्ता वस्तु ल्याउन–लैजान समेत रोक लगाएको जनाएको छ।
सहायक प्रमुख जिल्ला अधिकारी घनश्याम न्यौपानेका अनुसार बर्ड फ्लु मानिसमा समेत सर्न सक्ने भएकाले जोखिमलाई गम्भीर रूपमा लिँदै नियन्त्रण अभियान तीव्र बनाइएको छ। “रोग थप फैलिन नदिन आवश्यक सबै कदम चालिएका छन्, सबैले सतर्कता अपनाउनुपर्छ,” उनले भने।
यसअघि चैत ११ गते पहिलो पटक सङ्क्रमण पुष्टि भएपछि विभिन्न प्रभावित फार्महरूमा कुखुरा र अण्डा नष्ट गर्ने अभियान सञ्चालन गरिएको थियो। इटहरी–१९ स्थित एक फार्ममा मात्रै ११ हजारभन्दा बढी कुखुरा र अण्डा नष्ट गरिएको थियो भने अन्य स्थानहरूमा पनि सयौँको सङ्ख्यामा कुखुरा मारिएको थियो।
त्यसैगरी, सोमबार रामधुनी नगरपालिका–६ स्थित एक ठुलो पोल्ट्री फार्ममा करिब एक लाख ५० हजार लेयर्स कुखुरामा सङ्क्रमण पुष्टि भएपछि सबै नष्ट गरिएको जनाइएको छ, जसले जिल्लामा त्रास झन् बढाएको छ।
जिल्ला प्रशासनले कृषक, व्यवसायी तथा सर्वसाधारणलाई अफवाहमा नलाग्न, तर उच्च सावधानी अपनाउन र नियन्त्रण अभियानमा सहयोग गर्न आग्रह गरेको छ।

प्रकाशित मिति: बुधबार, वैशाख ९, २०८३ ०८:००

प्रतिक्रिया दिनुहोस्