हर्क साम्पाङको पार्टीबाट पाँचजनाद्वारा पार्टी परित्यागको घोषणा

दैनिक समाचार

गृहपृष्ठ
दैनिक समाचार

हर्क साम्पाङको पार्टीबाट पाँचजनाद्वारा पार्टी परित्यागको घोषणा

फक्ताङलुङ म्यागजिन संवाददाता बुधबार, जेठ २०, २०८३

धरानः धरानमा श्रम संस्कृति पार्टी छाड्न थालेका छन् । सार्वजनिकरूपमा जसले श्रम संस्कृति पार्टी छाडे उनीहरू पहिलो व्यक्तिहरू हुन् ।
केन्द्रीय सदस्यदेखि प्रदेश सदस्यसम्मले सामूहिक राजीनामा दिएका हुन् । पार्टी परित्याग गर्नेहरुमा केन्द्रीय सदस्य पूर्ण गहतराज विश्वकर्मा, प्रदेश सदस्य विष्णुकुमारी राई, प्रदेश सदस्य निनाचन्द्र राई, प्रदेश सदस्य नरहरि राई, सदस्य अटलसिंह राई रहेका छन् । उनीहरुले पत्रकार सम्मेलन गरेर पार्टी छाडेको घोषणा गरेका हुन् ।
उनीहरुमध्ये निनाचन्द्र राई केही महिनाअघि मात्रै पार्टीमा प्रवेश गरेका थिए । उनी दुई महिना पनि पार्टीमा टिक्न सकेनन् । निनाचन्द्र धरान उपमहानगरपालिकाकाको मेयरको आकांक्षीको दौडमा थिए ।
पार्टीका अध्यक्ष हर्कराज राई (साम्पाङ) ले निनाचन्द्रलाई प्रदेशको मन्त्री बनाउने भन्दै धरान–४ का निवर्तमान वडाध्यक्ष धनबहादुर राईलाई पार्टीको टिकट दिइसकेको भन्दै सामाजिक सञ्जाल फेसबुकबाटै सार्वजनिक गरेपछि उनी ‘ब्याक’ हटेको बजारमा चर्चा छ ।
उता गहतराज साम्पाङको शुरुवाती अभियानदेखि लागेका व्यक्ति हुन् । उनी यसअघि कांग्रेसमा प्रवेश गरेर फेरि श्रम संस्कृतिमै फर्किएका थिए । निनाचन्द्रले साम्पाङलाई ‘धरानमा श्रमदान’ गर्नुपर्छ भनेर सल्लाह दिने र साम्पाङलाई साथ सपोर्ट गर्ने व्यक्ति आफू भएको दावी गर्दै तर पार्टी अध्यक्ष साम्पाङले ‘म आफैंले गरेको हो’ भन्दै अस्वीकार गर्दै आएको गुनासो गर्दै पनि आएका छन् । पार्टी छाड्ने अन्य व्यक्तिहरु पनि साम्पाङको अभियानदेखि नै सपोर्ट गर्दै आएका व्यक्तित्वहरू हुन् ।
प्रेस विज्ञप्तिमा पार्टी नेतृत्वप्रति गम्भीर असहमति जनाउँदै उनीहरूले साधारण सदस्यता समेत नरहने गरी पार्टी छाडेको जनाइएको छ । उनीहरूले आगामी स्थानीय निर्वाचनमा धरान उपमहानगरपालिकाको नगर प्रमुख तथा वडा तहमा उम्मेदवारी दिने तयारीका साथ उनीहरू पार्टीमा प्रवेश गरेको दावी गरेका छन् । पार्टी अध्यक्ष हर्कराज राईसँग पटक–पटक छलफल तथा सहमति भएको दाबी गर्दै आफूहरूलाई नगर प्रमुखको उम्मेदवार बनाइने आश्वासन दिइएको उल्लेख गरेका छन् ।
तर केही दिनअघि पार्टी अध्यक्षले फेसबुक स्टाटसमार्फत् धनबहादुरलाई नगर प्रमुखको उम्मेदवार घोषणा गरेपछि आफूहरू आश्चर्यचकित भएको विज्ञप्तिमा उल्लेख छ । नेतृत्वले दिएको प्रतिबद्धताविपरीत निर्णय गरेको र नैतिकताको आधारमा पार्टीमा बसिरहन नसकिने निष्कर्षमा पुगेको उनीहरूको भनाइ छ ।
विज्ञप्तिमा पार्टी नेतृत्वले कार्यकर्ताको भावना र सहमतिलाई बेवास्ता गरेको आरोप लगाइएको छ । पार्टीभित्र भएका छलफल, सहमति र प्रतिबद्धतालाई तोडेर एकपक्षीय निर्णय गरिएको भन्दै उनीहरूले त्यसप्रति कडा असन्तुष्टि व्यक्त गरेका छन् । उनीहरूले आफूहरूसँगै उपस्थित अन्य सदस्यहरूले समेत साधारण सदस्यता नरहने गरी पार्टी परित्याग गरेको जनाएका छन् ।
पार्टीका प्रवक्ता सत्य घलेले पार्टीमा आउने जानु सामान्य भएको बताए । ‘अन्य दलहरू पनि पार्टी परित्याग गर्दै हाम्रै पार्टीमा आइरहेका छन्’, उनले भने, ‘यो सामान्य हो ।’
यो घटनाले धरानको स्थानीय राजनीतिमा नयाँ समीकरण र बहस सिर्जना गर्ने अनुमान गरिएको छ । यसअघि राष्ट्रिय स्वतन्त्र पार्टीले निनाचन्द्रलाई सुनसरीको १ सांसद्को उम्मेदवार बनाउन खोजेको निनाचन्द्र निकटका व्यक्तिहरुले दावी गर्दै आएका छन् ।

प्रकाशित मिति: बुधबार, जेठ २०, २०८३ ११:०१

प्रतिक्रिया दिनुहोस्