धरानः अन्ततः धरानमा २५ वर्षपछि नयाँ स्मार्ट बसपार्क (आधुनिक बसपार्क) सञ्चालनमा आएको छ ।
धरान उपमहानगरपालिकाका कार्यवाहक मेयर अइन्द्रविक्रम बेघाले शनिबार एक कार्यक्रमका बीच बसपार्कको उद्घाटन गरेका छन् । कार्यक्रममा बोल्दै उनले बसपार्क जे जस्तो विवाद भएपनि सञ्चालनमा आउनु गौरवको कुरा भएको बताए । उनले अब आउने समस्यालाई क्रमशः समाधान गर्दै बसपार्क नियमित सञ्चालनमा आउने बताए । कार्यक्रममा पूर्व मेयर तिलक राई, पूर्व कार्यवाहक मेयर मञ्जु भण्डारीलगायत धरानबासीको उपस्थिति थियो ।
करिब एक बिघा सात कट्ठामा बनेको बसपार्क संघीय सरकारको ५० प्रतिशत र धरान उपमहानगरपालिकाको ५० प्रतिशत आन्तरिक स्रोतबाट बसपार्क बनेको हो । बिकोइ गीताञ्जली जेभी दुहबी सुनसरीले बसपार्क २५ करोड १५ लाख रुपैयाँमा निर्माण सम्पन्न भएको धरान उपमहानगरपालिकाले जनाएको छ ।
बसपार्कमा भुइँतलामा करिब तीन सय यात्रु बस्न मिल्ने प्रतिक्षालय, टिकट काउन्टर, एटिएम बुथ, सिसीटिभी र सुरक्षा कक्ष, सार्वजनिक शौचालय, प्राथमिक उपचार कक्ष, मिनीमार्ट, यात्रु ओर्लने तथा चढ्ने २२ अटो रहनेछन् । भवनको पहिलो तलामा उपमहानगरको आम्दानी प्रयोजनका लागि पसल राख्न सकिने गरी १८ कोठा छन् । बसपार्कमा ३७ वटा बस, २४ कार–जीप, ७२ मोटरसाइकल र ८२ अटो पार्किङ गर्न सकिने व्यवस्था छ ।
बसपार्कबाट झापा, ताप्लेजुङ, इलाम पाँचथर, धनकुटा, तेह्रथुम, भोजपुर, राजविराज, विराटनगर लगायत गन्तव्यमा यात्रु लिएर जान क्युमा रहने १९ वटा बस र अन्य १८ वटा बस गरी ३७ बस अट्ने क्षमता छ । यस्तै बसपार्कमा यात्रु लिएर आउने जाने २४ कार–जीजप, ७२ वटा दुईपाङ्ग्रे र ८२ वटा अटो पनि अटाउने क्षमता छ ।
धरानमा लामो समयदेखि व्यवस्थित बसपार्क नहुँदा समस्या हुँदै आएको थियो । साँघुरो बसपार्कका कारण यात्रुलाई हुने सास्ती र समस्यालाई ध्यानमा राखेर उपमहानगरपालिकाले अत्याधुनिक भवनसहित स्मार्ट बसपार्क बनाएको हो ।
२५ वर्षसम्म बसपार्क सञ्चालन नहुँदा सरकारको करोडौं रुपैयाँ लगानी र स्थानीयले दिएको निःशुल्क जग्गा उपयोगविहीन बनेको भन्दै आलोचना समेत हुने गरेको थियो । सुनसरीको दुहबीस्थित एमएस बिकोइ गीताञ्जली जेभीले पूर्वसम्झौताअनुसार ०८१ असार अन्त्यमा धरान बसपार्क निर्माण सम्पन्न गरी उपमहानगरपालिकालाई जिम्मा लगाएको थियो ।
धरान–८ स्थित रेडियो नेपालको टावर नजिक सो बसपार्क सञ्चालनमा आएको हो । तीनकुने सुन्दर बस्ती विकास आयोजनाअन्तर्गत आधुनिक बसपार्क निर्माणको अवधारणा अघि सारिएपछि तत्कालीन मन्त्रिपरिषद्को २०६२ वैशाख २० गतेको बैठकले बसपार्कसहित तीनकुने सुन्दर बस्ती विकास आयोजना स्वीकृत गरेको थियो ।
आयोजना क्षेत्रभित्र पर्ने १ सय ७ जना जग्गाधनीको १३ बिघा ६ कट्ठा १९ धुर जग्गा अधिग्रहण गरी एउटै कित्ता बनाएर काम शुरु भएपनि ३८ कट्ठा जग्गा ‘मल्टिपर्पोज एरिया’ का लागि छुट्याइएपछि विवाद शुरु भएको थियो । जिल्ला, उच्च हुँदै सर्वोच्च अदालतसम्म मुद्दा पुगेको थियो । त्यो बेलाका मेयर स्व. तारा सुब्बाको पहलमा सहमति जुटाएर पछि कार्यवाहक मेयर मञ्जु भण्डारी सुवेदीले ०७५ माघ २७ मा बसपार्कको शिलान्यास गरेकी थिइन् ।
आन्तरिक विवाद र प्रशासनिक कारणले सञ्चालनमा आउन नसकेको बसपार्कबारे धरान उपमहानगरपालिकाको नगर कार्यपालिका बैठकले असार १ गते उदघाटन गरेसँगै सञ्चालनमा ल्याउने गरी सर्वसम्मतले निर्णय गरेपनि १३ गतेदेखि बसपार्क सञ्चालनमा आएको हो ।
धरान उपमहानगरपालिकाले हाल भानुचोक क्षेत्रबाट सञ्चालन हुँदै आएका सार्वजनिक सवारी साधनलाई क्रमशः नयाँ बसपार्कमा स्थानान्तरण गर्ने तयारी गरेको छ । यसबाट धरानको यातायात व्यवस्थापन थप व्यवस्थित हुने, ट्राफिक चाप कम हुने तथा शहरको सौन्दर्य बढ्ने अपेक्षा गरिएको छ ।
कार्यविधिअनुसार बसपार्कभित्र सवारी पार्किङ, टिकट काउन्टर व्यवस्थापन, रुट सञ्चालन, सुरक्षा, सरसफाइ तथा हरियाली प्रवद्र्धनका कामलाई व्यवस्थित गरिनेछ । साथै प्रवेश शुल्क, पार्किङ शुल्क तथा संरचना भाडाबाट नगरको आन्तरिक राजस्वसमेत वृद्धि हुने अपेक्षा गरिएको छ ।
