धरानको बीपी प्रतिष्ठानमा बीमा सेवाका लागि परिपत्र जारी

दैनिक समाचार

गृहपृष्ठ
दैनिक समाचार

धरानको बीपी प्रतिष्ठानमा बीमा सेवाका लागि परिपत्र जारी

फक्ताङलुङ म्यागजिन संवाददाता मंगलबार, साउन २६, २०८३

धरानः बीपी कोइराला स्वास्थ्य विज्ञान प्रतिष्ठानले स्वास्थ्य बीमाअन्तर्गत ओपिडी सेवा प्रवाह, अभिलेखीकरण तथा दाबी व्यवस्थापन प्रक्रियालाई थप व्यवस्थित बनाउन नयाँ व्यवस्था लागू गरेको छ।
स्वास्थ्य बीमा दाबी समीक्षा तथा मूल्याङ्कन कार्यविधि, २०७८ (पहिलो संशोधन, २०८१) बमोजिम सेवा प्रवाहलाई पारदर्शी र प्रभावकारी बनाउने उद्देश्यले प्रतिष्ठानले साउन २५ गते सूचना जारी गर्दै यो व्यवस्था आजैदेखि लागू हुने जनाएको छ।
नयाँ नियम अनुसार स्वास्थ्य बीमाअन्तर्गत ओपिडी टिकटको दर्ता तोकिएको कार्यालय समयभित्र मात्र गर्न सकिनेछ। दर्ता गरिएको टिकटको मान्य अवधि सात दिन रहनेछ। सो अवधिभित्र सोही विभागमा फलो-अप सेवाका लागि पुनः ओपिडी दर्ता गर्नु पर्ने छैन।
चिकित्सकले अर्को विभागमा सिफारिस गरेमा वा सात दिनको समय समाप्त भएपछि थप सेवा लिन पुनः दर्ता गर्नुपर्नेछ। बिमितले आफ्नो इच्छाअनुसार अर्को विभागको ओपिडी सेवा लिन चाहेमा पनि पुनः दर्ता गर्नुपर्नेछ, तर त्यसका लागि सोही दिन अन्य कुनै विभागको ओपिडी वा फलो-अप सेवा लिएको हुनुहुँदैन।
त्यसैगरी आवश्यक प्रयोगशाला, रेडियोलोजी, औषधि वा अन्य कुनै पनि सेवाको बिलिङ गर्नुपूर्व बिमितले आफ्नो ओपिडी कार्डसहित तोकिएको काउन्टरमा उपस्थित भई स्क्यानिङ गराउनुपर्नेछ। स्क्यानिङ पूरा भएपछि काउन्टरका कर्मचारीले ओपिडी कार्डमा ‘स्क्यान्ड’ छाप अनिवार्य रूपमा लगाउनेछन्।
चिकित्सकले ओपिडी कार्डमा बिरामीको रोगको पहिचान, उपचार योजना, आवश्यक परीक्षण, सिफारिस गरिएका औषधिको विवरण स्पष्ट र पढ्न सकिने गरी लेख्नुपर्नेछ। साथै चिकित्सकको नाम, नेपाल मेडिकल काउन्सिल दर्ता नम्बर र हस्ताक्षर वा आधिकारिक छाप अनिवार्य हुनुपर्नेछ।
तोकिएका प्रक्रिया र सर्तहरू पूरा नभएमा बीमाअन्तर्गतका सेवाको बिलिङ प्रक्रिया अगाडि नबढ्ने र दाबी अस्वीकृत हुन सक्ने निमित्त अस्पताल निर्देशक डा. इन्द्र कुमार लिम्बुले जानकारी दिएका छन्। important-notice-reg-swastha-bima_Sm1MR56FFq-1786431116.jpg