धरानमा एसइई सिङगिङ र डान्सिङ आइडलमा जित्नेलाई कार्मेल र सुनाखरीद्वारा सम्मान

दैनिक समाचार

गृहपृष्ठ
दैनिक समाचार

धरानमा एसइई सिङगिङ र डान्सिङ आइडलमा जित्नेलाई कार्मेल र सुनाखरीद्वारा सम्मान

फक्ताङलुङ म्यागजिन संवाददाता सोमबार, असार २०, २०७९

धरानः धरान–१८ स्थित कार्मेल हाइस्कुलले ‘एसइई स्टेट–१ सिङ्गीङ आइडल सिजन–२’ का बिजेता छिरिङ तामाङलाई सम्मान गरेको छ ।
सोमबार स्कुल प्राङ्गणमा विद्यार्थीहरुका बीच उनलाई सम्मान गरेको हो । स्कुलकी प्रिन्सिपल सुभद्रा राईले उनलाई खदा र नगद ५ हजारले सम्मान गरेकी थिइन् । अभिभावक टेकबहादुर घिसिङ र पदमा तामाङलगायत विद्यार्थीको उपस्थितिमा उनलाई सम्मान गरिएको थियो । कार्यक्रममा बोल्दै छिरिङले कार्मेलका विद्यार्थी, शिक्षकलगायत धरानबासीले भोट गरेर जिताएको भन्दै धन्यवाद प्रकट गरेका थिए । कार्यक्रममा उनले गीत सुनाएर विद्यार्थीलाई मनोरञ्जन साथै हौसला प्रदान गरेका थिए ।
यस्तै, प्रतियोगिताको सेमीफाइनलसम्म पुग्न सफल जोङसाङ गुरुङ, जेयुष राई र अल्वर्ट राईलाई समेत खदा र ११ सय नगदसहित सम्मान गरिएको थियो ।
डाइरेक्टर वीरबल शेर्पाले छिरिङले जित्दा गौरव महसुस भएको बताए । ‘जे होस् छिरिङले जितेर स्कुलको इज्जत मात्रै बढाएका छैनन्, गौरव समेत बढाएका छन्, यसले अन्य विद्यार्थीमा लुकेर रहेको थप प्रतिभा बाहिर प्रष्फुटित हुन्छ भन्ने समेत सन्देश गएको छ ।’
कार्यक्रम नेपाली विभागका अध्यापक केशव न्यौपानेले सञ्चालन गरेका थिए । छिरिङले आयोजक फक्ताङलुङ मिडिया हाउस प्रालिले आयोजना गरेको प्रतियोगितामा उपाधिसँगै ५० हजार नगद र धरानको युएन, नवोदय कलेज वा काठमाडौंको काठमाडौं मोडल कलेजमा प्लस टु अध्ययनका लागि पूर्ण छात्रवृत्ति पाएका छन् ।
सुनाखरी एकेडेमीद्वारा सम्मान

यसैबीच धरान–१२ स्थित सुनाखरी एकेडेमीले ‘एसइई स्टेट–१ डान्सिङ आइडल र सिङ्गीङ आइडल सिजन–२’ मा जित्ने छात्रछात्रालाई सम्मान गरेको छ ।
सम्मानित हुनेहरुमा प्रतियोगिताको डान्सिङतर्फ सेकेण्ड रनरअपको उपाधि जित्न सफल प्रकृति खापुङ रहेकी छिन् । यस्तै, सिङ्गीङतर्फ वेष्ट परफमरको उपाधि जित्न सफल ओङदी तामाङलाई पनि सम्मान गरिएको प्रिन्सिपल मिलनकुमार राईले जानकारी दिए । प्रकृतिले १५ हजार रुपैयाँ नगद र प्लस टु पढ्न ५० छात्रवृत्ति प्राप्त गरेकी छिन् ।
सोमबार स्कुल प्राङ्गणमा विद्यार्थीहरुका बीच उनीहरुलाई सम्मान गरेको हो । स्कुलका प्रिन्सिपल मिलनकुमार राई, डाइरेक्टर प्रदीपकुमार राईलगायतले उनीहरुलाई अविर र खदाले सम्मान गरेका थिए । विद्यार्थीहरुको उपस्थितिमा उनीहरुलाई सम्मान र हौसला प्रदान गरिएको प्रिन्सिपल राईले जानकारी दिए । प्रिन्सिपल राईले छात्रछात्राले उपाधि जितेर स्कुलको गौरव बढाएको बताए ।
उनका अनुसार विद्यार्थीले स्कुलका हरेकजसो अतिरिक्त क्रियाकलापमा जित्दै स्कुलको नाम, इज्जत बढाउँदै आएको बताए ।