धरानको पुतलीलाइन सडक पनि एकतर्फी नियम

अर्थ

गृहपृष्ठ
अर्थ

धरानको पुतलीलाइन सडक पनि एकतर्फी नियम

फक्ताङलुङ म्यागजिन संवाददाता आइतबार, असार ३, २०८१

धरानः धरानको पुतलीलाइन सडक आज (आइतबार) देखि यातायातलाई वान वे (एकतर्फी) नियम लागू गरिएको छ ।
स्थानीयले नै बढी जाम भएको र सडकमा हिँडडुलमा असहजता महसुस गरेको भन्दै गुनासो गर्न थालेपछि विशेषतः ट्राफिक प्रहरीले धरान उपमहानगरपालिकामा छलफल चलाएको थियो । त्यसपछि एकतर्फी नियम लागू गरिएको हो ।
अब पुतलीलाइनमा ‘वान वे’ बाट मात्र सवारी साधन सञ्चालन गर्न पाइने व्यवस्था गरेको छ । धरानका मेयर हर्क साम्पाङ राईको संयोजकत्वमा केही समयअघि बसेको बैठकले दुर्घटना न्यूनीकरण गर्न ‘वान वे’ बाट सवारी आवतजावत गर्ने व्यवस्था मिलाएको हो ।
भानुचोकदेखि पश्चिमतर्फ एकतर्फीरुपमा सवारी साधनहरु गुड्न पाउनेछन् भने भाटभटेनी हुँदै आउने सवारी साधनलाई गौतमपथ हुँदै भानुचोक जान पाउने छन् । भानुचोक आउनका लागि आचार्यलाइन वा अन्य बाटो प्रयोग गर्न पाउने साथै गौतम पथबाट जान पाइने तर आउन नपाइने व्यवस्था गरिएको जिल्ला ट्राफिक प्रहरी कार्यालय धरानका प्रमुख सुभाष केसीले जानकारी दिए ।
आइतबार बिहान धरान उपमहानगरपालिकाका मेयर हर्कराज राई साम्पाङ, वडाध्यक्ष रुपेश आचार्यलगायत घोषणा कार्यक्रममा सहभागी थिए । कार्यक्रममा बोल्दै मेयर साम्पाङले सवारी साधनलाई व्यवस्थित गर्न जिल्ला ट्राफिक प्रहरी कार्यालयबाट सुझाव प्रतिवेदन आएको हुनाले व्यवस्थित गर्न खोजिएको बताए । उनले वडाध्यक्षसँग छलफलमा बसेर यो निर्णय कार्यान्वयन गर्न खोजिएको बताए । मेयर साम्पाङले दुर्घटना र भीडभाड कम गर्ने उद्देश्यले वान वे शुरु गरिएको बताए ।
उनले सडक साँघुरो भएपनि घर भत्काउनेभन्दा पनि जे जस्ता सडक छन् त्यसलाई नै वान वे रुपमा अपनाइएको बताए । उनले भानुचोकदेखि लक्ष्मीचोकसम्म वान वे लागू गर्दा असजता महसुस गरेर गुनासो बढेको तर पछि बुझ्दै गएपछि धेरै सहजता आएको समेत बताए ।

प्रकाशित मिति: आइतबार, असार ३, २०८१ ११:०५

प्रतिक्रिया दिनुहोस्