धरान उपमहानगरपालिकाको २ अर्ब ७६ करोड बढी बजेट, विकास र खानेपानी प्राथमिकतामा

अर्थ

गृहपृष्ठ
अर्थ

धरान उपमहानगरपालिकाको २ अर्ब ७६ करोड बढी बजेट, विकास र खानेपानी प्राथमिकतामा

फक्ताङलुङ म्यागजिन संवाददाता बिहीबार, साउन २८, २०८३

धरान उपमहानगरपालिकाले आर्थिक वर्ष २०८३/८४ का लागि २ अर्ब ७६ करोड १९ लाख २७ हजार रुपैयाँको बजेट पारित गरेको छ।
बिहीबार सम्पन्न १९औँ नगरसभाले सडक तथा भौतिक पूर्वाधार, खानेपानी, शिक्षा, स्वास्थ्य, पर्यटन, कृषि, रोजगारी र विपद् व्यवस्थापनलाई प्राथमिकतामा राख्दै बजेट स्वीकृत गरेको हो।
कार्यवाहक नगर प्रमुख अइन्द्रविक्रम बेघाले प्रस्तुत गरेको बजेटमा नगर कार्यपालिकातर्फ २ अर्ब ४७ करोड ४८ लाख ३३ हजार र २० वटा वडा कार्यालयतर्फ २८ करोड ७० लाख ९४ हजार रुपैयाँ विनियोजन गरिएको छ।
बजेटका लागि आन्तरिक राजस्वबाट १ अर्ब ४० करोड ९४ लाख ८८ हजार, संघीय अनुदानबाट ८६ करोड १९ लाख, प्रदेश सरकारको अनुदानबाट ९ करोड १६ लाख ४८ हजार, राजस्व बाँडफाँटबाट ३२ करोड ८८ लाख ९१ हजार, सडक बोर्ड नेपालबाट १ करोड र गत वर्षको मौज्दातबाट ७ करोड रुपैयाँ प्राप्त हुने अनुमान गरिएको छ।
शहरी योजना तथा भौतिक पूर्वाधार विकासतर्फ ९९ करोड ५० लाख रुपैयाँ विनियोजन गरिएको छ। यसअन्तर्गत ‘खाल्डाखुल्डीमुक्त नगर’ कार्यक्रमका लागि ४ करोड, भानुचोक सौन्दर्यीकरण तथा स्थायी स्टेज निर्माणका लागि १ करोड र धरान–८ स्थित सभागृह निर्माणका लागि २ करोड रुपैयाँ छुट्याइएको छ।
स्वास्थ्य क्षेत्रतर्फ १२ करोड ४५ लाख रुपैयाँ विनियोजन गरिएको छ। यसमध्ये सशर्त अनुदानबाट ९ करोड ३३ लाख, धरान अस्पताल सञ्चालनका लागि २ करोड र बीपी कोइराला स्वास्थ्य विज्ञान प्रतिष्ठानसँग सहकार्यका लागि ५० लाख रुपैयाँ छुट्याइएको छ।
शिक्षा, युवा तथा खेलकुदतर्फ ४९ करोड ८६ लाख ८२ हजार रुपैयाँ विनियोजन गरिएको छ। संघ र प्रदेश सरकारको सशर्त अनुदानसमेत समेटिएको उक्त बजेटबाट शैक्षिक तथा खेलकुद कार्यक्रम सञ्चालन गरिनेछ। एउटा सामुदायिक विद्यालयलाई स्कुल बस उपलब्ध गराउने कार्यक्रमसमेत बजेटमा समेटिएको छ।
सामाजिक विकासतर्फ आन्तरिक स्रोतबाट १० करोड रुपैयाँ विनियोजन गरिएको छ। सुकुम्बासी व्यवस्थापनका लागि ५० लाख, सिटी सफारी तथा ट्याम्पो चालक दुर्घटना सहयोग कोषका लागि २० लाख, बाँदर नियन्त्रणका लागि १० लाख, विपन्न परिवारका सदस्यको दाहसंस्कारमा साझेदारीका लागि १० लाख र लैंगिक समानता तथा समावेशीकरण कार्यक्रमका लागि १ करोड ५ लाख रुपैयाँ छुट्याइएको छ।
आर्थिक विकासतर्फ ६ करोड ८० लाख रुपैयाँ विनियोजन गरिएको छ। यसमध्ये संकटग्रस्त सहकारी व्यवस्थापनका लागि मात्रै ५ करोड रुपैयाँ छुट्याइएको छ।
वन, वातावरण, ऊर्जा तथा विपद् व्यवस्थापनतर्फ ३ करोड ९५ लाख ७५ हजार रुपैयाँ विनियोजन गरिएको छ। विपद् व्यवस्थापन कोषका लागि २ करोड रुपैयाँ राखिएको छ। कानुन तथा न्याय सम्पादनतर्फ आन्तरिक स्रोतबाट २० लाख रुपैयाँ विनियोजन गरिएको छ।
धरानको खानेपानी समस्या समाधानका लागि चतरा–कोशी नदीबाट पानी आपूर्ति गर्ने नेपाल सरकारको योजनामा साझेदारी गर्न ३ करोड ११ लाख रुपैयाँ आन्तरिक स्रोतबाट विनियोजन गरिएको कार्यवाहक नगर प्रमुख बेघाले बताए।

प्रकाशित मिति: बिहीबार, साउन २८, २०८३ २०:१५

प्रतिक्रिया दिनुहोस्