शैक्षिक सत्र चैत मसान्तसम्म

शिक्षा

गृहपृष्ठ
शिक्षा

शैक्षिक सत्र चैत मसान्तसम्म

फक्ताङलुङ म्यागजिन संवाददाता बिहीबार, असार ११, २०८३

सरकारले अन्योलमा परेको नयाँ ‘शैक्षिक सत्र’ व्यवस्थापन गरेको छ। गत वैशाख २१ गतेदेखि पठनपाठन सुरु भए पनि चैत मसान्तसम्म नयाँ शैक्षिक सत्र कायम गरिएको छ।
सरकारले वैशाख १५ देखि नयाँ भर्ना थाल्ने र २१ गतेदेखि पठनपाठन सञ्चालन गर्ने निर्णय गरेपछि शैक्षिक सत्रबारे अन्योलमा थियो।
विगतमा वैशाख १ गतेदेखि शैक्षिक सत्र सुरु भएर चैत मसान्तसम्म कायम हुने गरेको थियो।
अर्कोतर्फ सरकारले आइतवार पनि बिदा दिने निर्णयका कारण पठनपाठनदेखि समग्र शैक्षिक क्यालेण्डरमा पर्ने असरको व्यवस्थापनमा ठूलो चुनौती थपिएको थियो।
उसो त यो निर्णयले सरकारले निर्दिष्ट गरेको विस्तृत पाठ्यक्रम निर्धारित समयमा पूरा नहुने र विद्यार्थीको सिकाइ उपलब्धिमा ह्रास आउने भएकाले वैशाख २१ गतेसम्म नै शैक्षिक सत्र लम्बिने कि भन्ने आमचासो र चिन्ता थियो।
अभिभावकहरू वैशाखसम्म नै शैक्षिक सत्र लम्ब्याइएमा १३ महिनाको पठनपाठन शुल्क तिर्नुपर्ने देखिएपछि चिन्तित थिए। किनभने सरकारले निजी विद्यालयलाई वैशाख महिनामा पठनपाठन नभएकाले उक्त महिनाको शुल्क नलिन निर्देशन दिए पनि अटेर गरी विद्यालयले वैशाख महिनाको पनि शुल्क लिइसकेका छन्।
चैत मसान्तसम्म मात्रै शैक्षिक सत्र कायम गरिएपछि अब अभिभावकहरूलाई पनि सहज भएको छ। शिक्षा तथा मानव स्रोत विकास केन्द्रका उपमहानिर्देशक एवं प्रवक्ता महेन्द्र पराजुलीले चैत मसान्तसम्म यो नयाँ शैक्षिक सत्र कायम हुने जानकारी दिए।
‘वैशाख २१ गतेबाट यसपाली पठनपाठन सुरु भए पनि चैत मसान्तसम्मै शैक्षिक सत्र कायम गरिएको छ, शैक्षिक सत्र लम्बिदैन, यो समयसम्म कोर्स सकाउन विभिन्न विकल्प खोजेर व्यवस्थापन गरिएको छ’,उनले भने।
१५ दिन बिदा कटौती
यो समयभित्र कोर्स सकाउन हिउँदे र वर्षामा दिइने बिदा कटौती गरिएको छ। शिक्षा तथा मानव स्रोत विकास केन्द्रको शैक्षिक योजना तथा विकास महाशाखाका निर्देशक श्यामप्रसाद आचार्यले हिउँदे तथा बर्खे बिदाको समय १५ दिन कटौती गरिएकाले चैतभित्र कोर्स सकिने जानकारी दिए।
उनका अनुसार हालसम्म एक शैक्षिक सत्रमा ४५ दिन बिदा दिइँदै आएको थियो। ‘पाठ्यक्रम अनुसारको कोर्स समयमा सकाउन सरकारले १५ दिन बिदा कटौती गरेको छ, यस्तो बिदा यस शैक्षिक सत्रका लागि अब ३० दिनको मात्रै हुनेछ’‚ उनले भने।
उनले सातामा दुई दिन (शनिबार र आइतबार) सार्वजनिक बिदा दिने निर्णय गर्दा पठनपाठनमा पुग्ने क्षति यो बिदा कटौतीले क्षतिपूर्ति गर्ने उनले बताए।
मन्त्रालयको यी निर्णय कार्यान्वयनका लागि शिक्षा तथा मानव स्रोत विकास केन्द्रले ७७ वटै शिक्षा, विकास तथा समन्वय एकाइ र सबै स्थानीय तहलाई पत्राचार गरेर निर्णय कार्यान्वयन गर्न निर्देशन पनि दिइसकेको छ।
शिक्षा तथा मानव स्रोत विकास केन्द्रका निर्देशक आचार्यका अनुसार विद्यालयमा प्रत्येक दिन प्रार्थना समय १५ मिनेट मात्रै कार्यान्वयन गर्ने, खाजा समय ३० मिनेट मात्रै छुट्याउने, सोमबारदेखि शुक्रबारसम्म पूरा समय पठनपाठनसँग सम्बन्धित क्रियाकलाप सञ्चालन हुनेछ।
पहिलो र दोस्रो त्रैमासमा गरिने आन्तरिक मूल्याङ्कनलाई पठनपाठन भएकै दिन वा पठनपाठनलाई असर नपर्ने गरी व्यवस्थापन गर्ने तथा अन्तिम परीक्षा तथा नतिजा प्रकाशनका लागि शैक्षिक सत्रको अन्तिमको १२ दिनलाई छुट्याइनेछ।
‘यी सबै व्यवस्थापन भएकाले तोकिएको शैक्षिक सत्र समयमै पठनपाठन सकिनेछ, त्यही भएर चैत मसान्तसम्म शैक्षिक सत्र कायम गरिएको छ, फेरबदल गरिएको छैन’, उनले भने।
शिक्षा नियमावलीमै पनि विद्यालयको शैक्षिक सत्र वैशाख १ गते प्रारम्भ भई चैत्र मसान्तसम्म कायम रहने व्यवस्था छ। विद्यालयले शैक्षिक सत्र शुरु भएको मितिले सामान्यतया एक महिनाभित्र नयाँ विद्यार्थी भर्ना गर्नुपर्ने नियमावलीमा व्यवस्था छ। यसपालि भने सरकारले नियमावली विपरीत शैक्षिक सत्र वैशाख १५ गतेदेखिमात्रै थाल्याे।